Այսօր Արցախի Ազգային ժողովում Արցախի Հանրապետության նախագահ Արայիկ Հարությունյանը, պատասխանելով պատգամավոր Մետաքսե Հակոբյանի՝ Լաչինի միջանցքին զուգահեռ կառուցվող ճանապարհի և Բերձոր, Աղավնո և Սուս համայնքներում հայերի բնակության հարցին, հայտնել է, որ Բերձորում արցախցիների ապրելու հնարավորությունը շատ քիչ է համարում։
«Գործող մայրուղին, ավելի ճիշտ՝ առաջարկվողը, քննարկվել է մի քանի անգամ Անվտանգության խորհրդում, որին մասնակցել են ԱԺ-ում ներկա բոլոր քաղաքական ուժերը: Մենք ընտրել ենք, ըստ մեզ, լավագույն տարբերակը: Կան գաղտնիքներ, որոնք ես չեմ ուզում այստեղ բարձրաձայնել: Ինչո՞ւ ենք ընտրել այդ տարբերակը՝ հենց հիմք ընդունելով անվտանգային հետագա մեր խնդիրը»,- ասել է նա:
Անդրադառնալով Բերձոր, Աղավնո և Սուս համայնքներում հայերի բնակության հարցին՝ Արայիկ Հարությունյանը ասել է, որ նման հարց չի քննարկվել և խոսքը միայն Աղավնո բնակավայրի մասին է, քանի որ 2020 թվականի նոյեմբերի 9-ի հայտարարության 6-րդ կետում գրված է, որ մենք պետք է Բերձոր քաղաքից դուրս գանք: Իսկ Աղավնոյի մասով ԱՀ իշխանությունները բանակցությունները շարունակում են տանել:
«Մենք որևէ մեկին չենք ասել՝ դուրս եկեք Բերձորից։ Սուս գյուղում մենք այսօր համարյա բնակիչ չունենք, նաև, որքան գիտեմ, սոցիալական ծրագրերի շրջանակներում Բերձորի և Սուսի բնակիչները ստացել են իրենց համապատասխան փոխհատուցումները: Անկախ ամեն ինչից՝ մենք Բերձորը պետք է շրջանցենք: Բերձորում մեր հայրենակիցների հետագայում ապրելու հնարավորությունը շատ քիչ եմ համարում, Աղավնոյում շարունակելու ենք մեր պայքարը»,- նշել է Հարությունյանը:
