Հունիսի 30-ին կայացած տարեկան ժողովում «Գազպրոմի» բաժնետերերը որոշել են չվճարել դիվիդենտներ 2021 թվականի համար, ասվում է ընկերության մամուլի հաղորդագրությունում։
«Բաժնետերերը որոշել են, որ ստեղծված իրավիճակում դիվիդենտների վճարումը աննպատակահարմար է 2021թ. արդյունքներով։ Ներկայումս «Գազպրոմի» առաջնահերթություններն են ներդրումային ծրագրի իրականացումը, այդ թվում՝ Ռուսաստանի Դաշնության մարզերի գազաֆիկացումը և գալիք ձմռան նախապատրաստումը։ Եվ, իհարկե, մենք պետք է պատրաստ լինենք կատարել ավելացված չափով հարկեր վճարելու մեր պարտավորությունները»,- մեջբերում է «Ինտերֆաքս»-ը «Գազպրոմ»-ի վարչության փոխնախագահ Ֆամիլ Սադիգովի հայտարարությունը։
Ավելի վաղ ընկերության տնօրենների խորհուրդը խորհուրդ էր տվել 2021 թվականի համար հաստատել դիվիդենտներ՝ մեկ բաժնետոմսի համար 52,53 ռուբլու չափով։ Այսպիսով, դիվիդենտների վճարումների ընդհանուր գումարը կարող է կազմել 1,244 տրիլիոն ռուբլի։ Ինչպես ընդգծել են ընկերությունից, սա ռեկորդային բարձր դիվիդենտ է ընկերության և ողջ ռուսական ֆոնդային շուկայի պատմության մեջ։
Դիվիդենտներ վճարելուց հրաժարվելու մասին հայտարարությունից հետո «Գազպրոմի» բաժնետոմսերը Մոսկվայի բորսայում էժանացել են ավելի քան 30 տոկոսով՝ յուրաքանչյուրը 310,82 ռուբլուց հասնելով 207,69 ռուբլու: Դրանից հետո Մոսկվայի բորսան դադարեցրել է ընկերության բաժնետոմսերի առուվաճառքը։
Աղբյուրը՝ Meduza.io
Թարգմանեց՝ Աստղ Խաչատրյանը
