Խորհրդարանը քննարկեց Իշխան Սաղաթելյանին ԱԺ փոխնախագահի և Վահե Հակոբյանին ԱԺ տնտեսական հարցերի մշտական հանձնաժողովի նախագահի պաշտոնից հետ կանչելու մասին «Քաղաքացիական պայմանագիր» խմբակցության նախագիծը։
Նախագծերը ներկայացրեցին «Քաղաքացիական պայմանագիր» խմբակցության պատգամավորներ Արուսյակ Ջուլհակյանը և Ծովինար Վարդանյանը:
Իշխան Սաղաթելյանը ԱԺ խորհրդի 25 նիստերից մասնակցել է միայն 7 նիստին։ Ջուլհակյանը մի քանի մեջբերում արեց Սաղաթելյանի հայտարարություններից։ Ըստ Ջուլհակյանի. «Իշխան Սաղաթելյանի հաճախակի բացակայությունների պատճառով նաև անհնարին է դարձել վերջինիս՝ ԱԺ նախագահի կողմից հանձնարարություններ տալը և լիազորությունների պատվիրակումը, ինչի հետևանքով նաև չեն իրացվել «ԱԺ կանոնակարգ» սահմանադրական օրենքի 6-րդ հոդվածի 2-րդ մասով սահմանված նորմերը»:
Ծովինար Վարդանյանն էլ նշեց, որ ԱԺ տնտեսական հարցերի մշտական հանձնաժողովը կարևոր նախագծեր է քննարկել։ Սակայն, Վահե Հակոբյանը 342 քվեարկություններից չի մասնակցել 194-ին, բացակայել ԱԺ խորհրդի 25 նիստերից 20 անգամ, հանձնաժողովի 27 նիստերից՝ 11-ից։
Սաղաթելյանին և Հակոբյանին պաշտոնանակ անելու փակ քվեարկությունն արդեն սկսվել է, այն կավարտվի 12:15:
