Ռուբեն Վարդազարյանը (որպես ԲԴԽ նախագահ և դատավոր լիազորությունները դադարեցված են) միջնորդություն է ներկայացրել Բարձրագույն դատական խորհուրդ` պահանջելով հետաձգել ԲԴԽ նախագահի ընտրությունները։ Նա ֆեյսբուքյան իր էջում հրապարակել է այդ միջնորդությունը։
Նշենք, որ ԲԴԽ–ն որոշում էր կայացրել Վարդազարյանին զրկել դատավորի և ԲԴԽ նախագահի լիազորություններից, իսկ Վարդազարյանն ու նրա շահերի պաշտպան Արամ Օրբելյանը Բարձրագույն դատական խորհուրդ բողոք էին ներկայացրել ընդդեմ այդ որոշման։
Այսպես, Վարդազարյանը միջնորդում է ԲԴԽ–ին նախագահի ընտրությունը հետաձգելու, բողոքի քննությունը մինչև ընտրությունը քննելու վերաբերյալ։ Այսինքն` Վարդազարյանը պահանջում է ԲԴԽ նոր նախագահ չընտրել՝ մինչև իր դեմ կայացած որոշման բողոքարկման պատասխանը չստացվի:
Հունիսի 23-ին հայտնի դարձավ` Վարդազարյանի լիազորությունները որպես դատավոր դադարեցվում են էական կարգապահական խախտման հիմքով։
Հիշեցնենք, որ ԲԴԽ նախկին նախագահը վելի վաղ մամուլի ասուլիս էր հրավիրել, որի ընթացքում գաղտնի ձայնագրություն էր հրապարակել և հայտարարել, թե ունի ապացույց, որ իր դեմ կատարվող «արշավն» ու ամեն ինչ քաղաքական որոշում է, ու ԲԴԽ-ում իրեն զրկել են ապացույց ներկայացնելու իրավունքից։
Ըստ Վարդազարյանի՝ ձայնագրությունը կատարվել է 2021 թվականի փետրվարի 20-ին. զրուցել են ինքը, ԲԴԽ նախագահի պարտականությունները կատարող Գագիկ Ջհանգիրյանն ու ԲԴԽ անդամ Ստեփան Միքայելյանը։
Հիշեցնենք, որ տարածված ձայնագրության վերաբերյալ հաղորդագրություն էր տարածել ՀՀ դատախազությունը: Կառույցից հայտնել էին, որ Վարդազարյանի և Ջհանգիրյանի խոսակցության ձայնագրությունը ստուգման նպատակով ուղարկվել է ՀՀ քննչական կոմիտե:
Ձայնագրությանն արձագանքել էր նաև ԲԴԽ-ն, որը հայտնել էր՝ Գագիկ Ջհանգիրյանը մասնավոր զրույցը չի մեկնաբանում, և այն տեղի է ունեցել առանց վերջինիս իմացության:
