ՀՀ ազգային ժողովի «Քաղաքացիական պայմանագիր» խմբակցության պատգամավոր Արսեն Թորոսյանը շնորհավորական ուղերձ է հղել Հայաստանի Հանրապետության սահմանադրության օրվա կապակցությամբ։
Թորոսյանի գրառումը ստորեւ․
«Այսօր Հայաստանի Հանրապետության սահմանադրության օրն է: 27 տարի առաջ այս օրը մեր ծնողները ԱՅՈ ասեցին մի փաստաթղթի, որը պետք է դառնար մեր պետականության հիմնաքարերից մեկը և որից պետք է բխեին մնացած բոլոր օրենքներն ու իրավական ակտերը: Որոշումն այդ կայացվում էր մեր պետության համար բարդ շրջանում, երբ այն փորձում էր վերականգնվել ավերիչ երկրաշարժի, պատերազմի և տնտեսական ճգնաժամի հետևանքներից և թևակոխել զարգացման փուլ, ինչի համար շատ կարևոր էր նաև երկրում առկա հասարակական և քաղաքական հարաբերությունների կարգավորումը, իրավակարգի սահմանումը, ժողովրդավարական ինստիտուտների կայացումը:
Որոշումն այդ անկյունաքարային էր մեր պետականության համար՝ կանխորոշելով դրա զարգացումը։ Այդ կարևորագույն փաստաթուղթը կոչվում է ՀՀ ՍԱՀՄԱՆԱԴՐՈՒԹՅՈՒՆ, որը փաստացի հանդիսանում է երկրի հիմնական օրենքը և օրենսդրության հիմքը:
Շնորհավորելով բոլորիս Սահմանադրության օրվա առթիվ ուզում եմ խնդրել բոլորիս և ցանկանալ, որպեսզի մեր պետականության պահպանման կամ մեր հայրենիքի մասին խոսելիս, մեր երկրի կենացը խմելիս, հիշենք որ լոկ խոսքերով դա հնարավոր չի լինելու անել: Դրա համար անհաժեշտ են իրականում շատ պարզ բաներ, որոնք սակայն գործողություն ու վարքագիծ են ենթադրում. վարքագիծ հարգելու բոլոր օրենքներն ու կանոնները և ոչ թե պարզապես խոսելու պետության և պետականության մասին, բայց հաջորդ րոպեին իսկ անարգելու դրանք, կարծես թե այդ օրենքներն ու կանոնները միայն այլոց համար են գրված։
Սիրելի հայրենակիցներ։
Շնորհավոր Սահմանադրության օրը»։
