Բրյուսելում գտնվող Հյուսիսատլանտյան դաշինքի կենտրոնակյանում այսօր ստորագրվել են Շվեդիայի և Ֆինլանդիայի՝ դաշինքին անդամակցելու մասին պաշտոնական արձանագրությունները։
Փաստաթղթի տակ իրենց ստորագրություններն են դրել Շվեդիայի և Ֆինլանդիայի արտգործնախարարներ Անն Լինդեն և Պեեկա Հավիստոն, ինչպես նաև դաշինքի անդամ հանդիսացող 30 պետությունների դեսպանները։
Արձանագրությունների ստորագրումից հետո դաշինքի անդամ պետությունների խորհրդարաններում մեկնարկելու է դրանց վավերացման գործընթացը։
Միայն դրա ավարտից հետո Հյուսիսային Եվրոպայի այս երկու պետությունները ՆԱՏՕ-ի լիիրավ անդամ կհամարվեն և դրանց դրոշները կբարձրացվեն դաշինքի կենտրոնակայանի առջև։
«Սա լավ օր է Ֆինլանդիայի և Շվեդիայի համար, սա լավ օր է ՆԱՏՕ-ի համար։ Այս սեղանի շուրջ նստած 32 պետություններով մենք ավելի ուժեղ կլինենք, իսկ մեր ժողովուրդներն՝ ավելի անվտանգ։ Այսօր մենք բախվել ենք տասնամյակների ընթացքում անվտանգային ոլորտում ծագած ամենալուրջ ճգնաժամին», – հայտարարում էր Հյուսիսատլանտյան դաշինքի գլխավոր քարտուղար Յենս Ստոլտենբերգը։
Աղբյուրը՝ Azatutyun.am
