ՀՀ քննչական կոմիտեի Արագածոտնի մարզային քննչական վարչությունում ձեռնարկվում են անհրաժեշտ միջոցառումներ՝ «Յունիբանկ» ԲԲԸ-ի մասնաճյուղում տեղի ունեցած պայթյունի բոլոր հանգամանքները պարզելու ուղղությամբ:
Այս մասին հայտնում են ՔԿ տեղեկատվության և հասարակյնության հետ կապերի բաժնից՝ նշելով, որ նախնական տվյալներով՝ բանկում պայթյունը տեղի է ունեցել գազի արտահոսքի հետևանքով:
Աշտարակ քաղաքում տեղի ունեցած պայթյունի վերաբերյալ ՀՀ ԱԻՆ 911 ծառայությունից հաղորդումը ստացվել է 2022թ. հուլիսի 6-ին՝ ժամը 09:05-ին:
«Յունիբանկ» ԲԲԸ-ի Աշտարակի մասնաճյուղում պայթյունը տեղի է ունեցել ժամը 09:03-ի սահմաններում, նախնական տվյալներով, գազի արտահոսքի հետևանքով, ինչի արդյունքում աշխատակիցներից յոթը տարբեր աստիճանի մարմնական վնասվածքներով տեղափոխվել են հիվանդանոց, որոնցից մեկը հիվանդանոցում մահացել է:
ՀՀ քրեական օրենսգրքի 412-րդ հոդվածի 2-րդ մասով նախաձեռնվել է վարույթ, կատարվում է նախաքննություն:
Վարույթն իրականացնող մարմնի որոշմամբ՝ նշանակվել են դատաբժշկական, դատապայթյունատեխնիկական, դատաշինարարատեխնիկական, դատահրդեհատեխնիկական, դատաապարանքագիտական և դատահետքաբանական փորձաքննություններ:
Հանձնարարություններ են տրվել հետաքննության մարմնին:
Ավելի վաղ հայտնել էինք, որ ըստ ԱԻՆ-ի հրապարակած նախնական տվյալների՝ բանկում պայթյունի հետևանքով կար մեկ զոհ և հինգ տուժած: Տուժածները հոսպիտալացվել էին Աշտարակ քաղաքի ԲԿ:
Դեպքը տեղի էր ունեցել Յունիբանկի «Աշտարակ» մասնաճյուղում, պայթունի հետևանքով մահացել է մասնաճյուղում մաքրման ծառայություն իրականացնող ընկերության աշխատակից Ռուզաննա Խաչատրյանը:
ՀՀ առողջապահության նախարարության հաղորդագրության համաձայն՝ պայթյունից տուժած 6 անձինք այրվածքներ են ստացել, 4 հոգի տեղափոխվել է Երևանի Այրվածքաբանության ազգային կենտրոն:
Բանկի մամուլի ծառայությունը խոստացել է փորձագետների եզրակացությունից հետո ավելի մանրամասն ներկայացնել տարածքում տեղի ունեցած պայթյունի հանգամանքները: