Պետական եկամուտների կոմիտեի նախագահի տեղակալ Ծովինար Սողոմոնյանը Ազգային ժողովում ներկայացրեց Հարկային օրենսգրքում և ինտերնետ շահումով խաղերի ու խաղատների մասին օրենքում լրացումներ և փոփոխություններ կատարելու մասին որոշման նախագծերի փաթեթը:
Նա նշեց, որ նախագծով՝ Հարկային օրենսգրքում կիրառվող ձևակերպումները համապատասխենեցվում են անկանխիկ գործառնությունների մասին օրենքում առկա գործող ձևակերպումներին, մասնավորապես՝ տնտեսվարողները պետք է պարտադիր ապահովեն վճարային քարտերով անկանխիկ վճարումներ ընդունելու պահանջը, եթե հաճախորդը նման ցանկություն է հայտնում: Իսկ երկրորդ փոփոխությամբ՝ կանխիկի սահմանաչափի նկատմամբ հսկողությունը կարող է ստուգվել հսկիչ գնումների իրականացման միջոցով:
«Հաջորդ փոփոխությունը վերաբերում է ինտերնետ շահումով խաղերի և խաղատների մասին օրենքին: Վերջերս այս օրենքով իրականացված փոփոխություններով սահմանվեց, որ խաղատներում խաղատան կազմակերպիչը պետք է ապահովի խաղանիշների փոխանակումը բացառապես անկանխիկ եղանակով, բայց պատասխանատվություն չսահմանվեց, և այս նախագծով սահմանվում է պատասխանատվություն՝ 200 հազար դրամ տուգանքի չափով յուրաքանչյուր դեպքի համար»,- ասաց նա:
