Փոքրիկ նարնջագույն հիվանդանոց՝ անիվների վրա: Շիրակի մարզում առաջին անգամ այսօր գործարկվեց բժշկական շարժական կայան՝ ազգաբնակչության առողջապահական խնդիրներին տեղում լուծում տալու, բժշկական ծառայություններն առավել մոտ ու մատչելի դարձնելու նպատակով: Մարդիկ կստանան անվճար բժշկական օգնություն՝ առանց տնից հեռանալու:
Ծրագիրը մարզում իրականացնում են «Ավրորա» համայնքի անդամ «EliseCare» հասարակական կազմակերպության հիմնադիր, բարերար Էլիզ Պողոսյանն ու կազմակերպության Հայաստանի մասնաճյուղի պատասխանատու Արմեն Թաշչին՝ Շիրակի մարզպետարանի հետ համագործակցությամբ:
Կազմակերպությունը հիմնականում անհապաղ բժշկական և հոգեբանական օգնություն է տրամադրում այն բնակչությանը, որոնք ապրում են հակամարտության գոտիներում։ Ծրագրեր է իրականացրել աշխարհի մի շարք հետպատերազմական երկրներում, այդ թվում նաև Արցախում։
Էլիզ Պողոսյանն ասում է՝ Շիրակ եկել են ելնելով առկա խնդիրներից:
«Պատերազմի ժամանակ շատ եկանք Հայաստան, հոս էլ եկանք: Ու հիմա գիտենք, որ խնդիրներ շատ կան, վիճակը վատ է, աղքատությունը շատ է: Տեսնենք՝ ինչպես կարող ենք օգնել: Կուզենք, որ Ֆրանսիայից էլ բժիշկներ գան»,-Շիրակի մարզպետի հետ հանդիպման ժամանակ տեղեկացրեց բարերարը:
Շարժական կայանում հիվանդներին կընդունեն նեղ մասնագետներ՝ սրտաբան, մանկաբարձ-գինեկոլոգ, սոնոգրաֆիստ, մանկաբույժ և այլ մասնագետներ՝ ըստ անհրաժեշտության: Բոլորը հայեր են, տեղի մասնագետներ: Հետազոտությունն ու ցանկացած գործողություն շարժական կայանում իրականացվելու է անվճար:
Մարզպետ Նազելի Բաղդասարյանը կարևոր է համարում նախաձեռնությունն ու շեշտում՝ թեև պետությունն իրականացնում է տարբեր ծրագրեր, այնուամենայնիվ, քիչ չեն դեպքերը, երբ հատկապես սահմանամերձ ու հեռավոր գյուղական բնակավայրերում նեղ մասնագետի կարիք է զգացվում:
«Ունենք սահմանամերձ գյուղեր, որտեղ բժշկությունն անհասանելի է, անմատչելի: Բնականաբար, պետությունն իր գործն անում է, սակայն ես կարծում եմ, որ շարժական կայանի տվյալ տարածքում գնվելը հնարավորություն կտա խնդիրներին արձագանքել ճիշտ պահին»,-ասաց մարզպետը:
Շիրակի մարզպետարանը ծրագրի պատասխանատուներին տրամադրել է ուսումնասիրությունների ու կարիքի իրենց գնահատումների վիճակագրությունը, որոնց հիման վրա որոշվել է, թե շարժական կայանը որ համայնքներում և ինչ ժամանակահատվածում է գտնվելու:
Մարզպետը նաև տեղեկացրեց, որ շուտով կայանը կունենա ուլտրաձայնային հետազոտության սարք: Առաջիկայում նախատեսվում է հետազոտություն անցած քաղաքացիներին տրամադրել նաև անվճար դեղորայք:
Ծրագրի ղեկավար Էլիզ Պողոսյանը լրագրողների հետ զույցում նշեց, որ Ֆրանսիայից դեղորայք կբերվի այն համայնքների բնակիչների համար, որոնց հետ կաշխատեն կայանի բժիշկները:
Այս փուլում շարժական կայանը կգտնվի Անի և Աշոցք խոշորացված համայնքներում: Այսօրվա առաջին կանգառները Շիրակավանն ու Գուսանագյուղն էին:
Աղբյուրը՝ Հայկական ժամանակ։
