Բջնիի Սուրբ Աստվածածին 11-րդ դարի եկեղեցու պատը վթարային վիճակում է. վարչապետ

Օրերս մենք եղանք Բջնիում, և այնտեղ ես արձանագրեցի, որ Բջնիի Սուրբ Աստվածածին 11-րդ դարի եկեղեցու պատը վթարային վիճակում է: Այս մասին Կառավարության հերթական նիստին ասաց ՀՀ վարչապետ Նիկոլ Փաշինյանը:

«Այնտեղ հենքեր են դրել, որպեսզի չփլուզվի պատը, և ես ԿԳՄՍ նախարարին հանձնարարել եմ, որ մենք իրականացնենք այդ ծրագիրը, հետո բարեբախտաբար պարզվեց, որ պատրաստի նախագիծ կա, և պետք է ընդամենը ֆինանսավորումն ապահովել»,- ասաց նա:

Վարչապետը նշեց նաև, որ կարևորագույն պատմամշակութային հուշարձան հանդիսացող Բջնիի ամրոցի հետ կապված հանձնարարականներ է տվել: «Մենք այնտեղ ճանապարհի խնդիր ունենք, որը շատ բարդ ճանապարհ է, շատ մեծ թեքություն ունի, բայց պետք է ճանապարհը կառուցել, նորոգել, որպեսզի զբոսաշրջային պոտենցիալն ամբողջությամբ իրացվի»,- ասաց վարչապետը:

Նիկոլ Փաշինյանը նկատեց նաև, որ հուշարձանի ներկայացման հետ կապված խնդիրներ կան, որտեղ պետք է լուծումներ գտնել և ունենք մի իրավիճակ, որ հուշարձանը թաքնված է այգիների մեջ: Նա հայտնեց, որ նորոգվող Բջնի-Հրազդան ճանապարհը տասնյակ տարիներով չնորոգված ճանապարհ է, և նորոգման արդյունքում զբոսաշրջային պոտենցիալն Աղվերան-Ծաղկաձոր հատվածում էականորեն կակտիվանա՝ Բջնին հաշվի առնելով որպես շատ կարևոր կանգառ: Նիկոլ Փաշինյանը նշեց, որ պայմանավորվել են հաջորդ տարվա համար դիտարկել Չարենցավանից Աղվերան տանող ճանապարհը: