Գլխավոր դատախազությունը ծանուցագրեր է ուղարկել Երևանի նախկին քաղաքապետին ու Հայաստանի նախկին գլխավոր դատախազին՝ տեղեկացնելով, որ իրենց ու իրենց հարազատներին պատկանող գույքի ծագման օրինականությունն ուսումնասիրել են, կազմել են ամփոփագրեր․ դատախազությունը նրանց ունեցվածքի որոշակի մասը որակել է ապօրինի։
Տարոն Մարգարյանն ու հետախուզման մեջ գտնվող Գևորգ Կոստանյանն անձամբ կամ ներկայացուցիչների միջոցով պետք է ծանոթանան այդ ուսումնասիրություններին, ինչից հետո որոշեն՝ համաձայն են դրանց հետ, թե ոչ։ Եթե համաձայնեն եզրակացություններին, օրենքով հնարավորություն ունեն առանց դատարանի որոշման ապօրինի որակված գույքի ու եկամուտների առնվազն 75 տոկոսը տալ պետությանը։ Հակառակ դեպքում դատախազությունը կդիմի դատարան, դատարանն էլ կորոշի՝ նախկին իշխանության ներկայացուցիչներից բռնագանձել նրանց ունեցվածքը, թե՝ ոչ։
44-ամյա Տարոն Մարգարյանի փաստաբանը պնդում է՝ առանց դատախազության ուսումնասիրությանը ծանոթանալու էլ կարող են ասել՝ Մարգարյանի գույքն ու եկամուտները ձեռք են բերվել օրինական ճանապարհով։
«Տարոն Մարգարյանը գիտի՝ այն գույքը, որ ունի իր ընտանիքը ու այն գույքը, որն ունի ինքը, օրինական են․ ունի էդ գույքի ծագման աղբյուրը, գույքի առաջացման աղբյուրը, որն օրինական է։ Հիմա մնացած մասով մենք չգիտենք միգուցե, օրինակի համար, դատախազությունը որոշակի գույք վերագրի պարոն Մարգարյանին, որն ուղղակի առնչություն չունի պարոն Մարգարյանի հետ։ Հիմա ես չեմ բացառում, հնարավոր է մարդիկ սխալվեն՝ առանց դիտավորության, բնականաբար, դա կպարզաբանվի։ Միգուցե ինչ-որ բաներ վերագրվեն պարոն Մարգարյանին, որի հետ էլի առնչություն չունի, կամ իր ընտանիքի անդամներն, օրինակի համար», – ասաց փաստաբանը։
Դատախազությունը դեռևս չի հրապարակել, իրավապահների գնահատմամբ, ապօրինի որակված ունեցվածքի մանրամասները, դա սովորաբար արվում է հայցերը դատարան ուղարկելու ժամանակ։
Երևանի նախկին քաղաքապետի փաստաբան Բենիկ Գալստյանը կարծում է՝ հարցը դրան չի էլ հասնի, քանի որ դատախազությունում իրենց դիրքորոշումը ներկայացնելուց հետո իրավապահները կհամաձայնեն, որ Մարգարյանն անօրինական ճանապարհով ձեռքբերված գույք ու եկամուտներ չունի։
«Առնվազն դատախազության մասով, ուսումնասիրության առումով, օրենքը մեզ որոշակի, ճիշտ է՝ սուղ, բայց հնարավորություններ է տալիս մեր դիրքորոշումը հիմնավորելու, որը մենք կանենք, և ես լիահույս եմ, որ արդեն էդ վարույթի փուլում դատախազությունը մեզ հետ համաձայնության կգա», – ասաց Գալստյանը։
Նախկին վարչապետ Անդրանիկ Մարգարյանի որդին 23 տարեկանից զբաղեցրել է տարբեր պետական պաշտոններ և իրավապահների ուշադրության կենտրոնում հայտնվել 2018-ի հեղափոխությունից հետո։
Երրորդ նախագահ Սերժ Սարգսյանի առաջնորդած Հանրապետական կուսակցության Գերագույն մարմնի անդամը Երևանը ղեկավարել է 7 տարի։ Հեղափոխությունից հետո Տարոն Մարգարյանին մեղադրանք առաջադրեցին պաշտոնեական լիազորությունների չարաշահման համար։
Ըստ Քննչական կոմիտեի`դեռևս քաղաքապետի առաջին տեղակալի պաշտոնը զբաղեցնելիս Մարգարյանը, պաշտոնեական լիազորությունները չարաշահելով, դպրոցներում ու մանկապատեզներում տարածքներ է օտարել։
Ըստ գործի տվյալների, Տարոն Մարգարյանը քաղաքապետարանի պաշտոնյաներին և աշխատակիցներին հանձնարարել է թողարկել դպրոցների հողատարածքների նոր հատակագծեր՝ դրանք փոքրացնելով, իսկ առանձնացված տարածքները օտարվել են իր մերձավորներին՝ շուկայականից ցածր գնով։
Տարոն Մարգարյանը մեղադրանքը չի ընդունում, նրա հետ մեդադրյալի աթոռին է կուսակցական ընկեր Գալուստ Սահակյանի որդին՝ Արման Սահակյանը, որն այդ ժանաակ զբաղեցրել է կառավարությանն առընթեր Պետական գույքի կառավարման վարչության պետի պաշտոնը։
Աղբյուրը՝ Azatutyun.am
