Հայաստանի Հանրապետության ազգային անվտանգության ծառայության Սահմանապահ զորքերի ծառայողները նշել են կազմավորման 30-ամյակը:
Հանդիսավոր միջոցառմանը ներկա են եղել ՀՀ վարչապետ Նիկոլ Փաշինյանը, ՀՀ ազգային անվտանգության ծառայության տնօրեն, գեներալ-մայոր Արմեն Աբազյանը, ՀՀ պաշտպանության նախարար Սուրեն Պապիկյանը, ՀՀ ոստիկանության պետ, գեներալ-մայոր Վահե Ղազարյանը և պաշտոնտար այլ անձինք:
Միջոցառումը մեկնարկել է ՀՀ պետական օրհներգի հնչյունների ներքո:
ՀՀ վարչապետը, շնորհավորելով Սահմանապահ զորքերի զինծառայողներին, իր խոսքում նշել է.
«Մեր ողջ պատմության ընթացքում` երրորդ հանրապետության, Սահմանապահ զորքերն իրենց նպաստն են բերել Հայաստանի Հանրապետության տարածքային ամբողջականության պահպանմանը և մեր բանակի հետ կատարել են այն խնդիրները, որոնք դրված են եղել բանակի առաջ: Բայց ուզում եմ ընդգծել, որ զուտ գաղափարի հայեցակարգի առումով, Սահմանապահ զորքերն ընդհանրապես խաղաղության սիմվոլ են և խաղաղության խորհրդանիշ»:
Օրվա գլխավոր իրադարձությունը դարձել է հանդիսավոր երթը, որն ուղեկցվել է Սահմանապահ զորքերի նվագախմբի հնչյունների ներքո:
ՀՀ վարչապետի միջնորդությամբ և նախագահի հրամանագրով Հայրենիքի սահմանները պաշտպանելիս ցուցաբերած խիզախության և նվիրումի համար հետմահու պարգևատրվել են կապիտան Հրանտ Գևորգի Արզումանյանը` «Արիության» մեդալով, իսկ ավագ սերժանտ Կառլեն Էդիկի Սարգսյանը՝ «Մարտական ծառայության» մեդալով: Պարգևները հանձնվել են հերոսաբար զոհված զինծառայողների ընտանիքի անդամներին:
«Մարտական ծառայության» մեդալով պարգևատրվել են նաև փոխգնդապետ Վահան Վալերիի Համբարձումյանը և մայոր Վլադիմիր Սերգեյի Թումասյանը:
Ավանդույթի համաձայն՝ հնչել է «Սահմանապահ ենք» երգը, որից հետո նվագախմբի ուղեկցությամբ Սահմանապահ զորքերի զինծառայողները ցուցադրել են շարային, իսկ կինոլոգիական կենտրոնը՝ ծառայողական շներով վարժաձևեր։
Միջոցառման ավարտին ՀՀ վարչապետը, ՀՀ ԱԱԾ տնօրենը, ՀՀ ԱԱԾ ՍԶ հրամանատարը, բարձրաստիճան հյուրերը և գերատեսչությունների ղեկավարները հարգանքի տուրք են մատուցել և ծաղիկներ խոնարհել հայրենիքի հանդեպ իրենց պարտքը կատարելիս զոհված և հերոսացած սահմանապահների հիշատակին կանգնեցված խաչքար-հուշակոթողներինЖ
