Իտալիայում առնվազն 400 ազգային և միջազգային չվերթ է չեղարկվել ավիացիոն անձնակազմի, բորդուղեկցողների և բյուջետային ավիաընկերությունների օդաչուների գործադուլի պատճառով։ Այս մասին հայտնում է Corriere della Sera թերթը։
Չորսժամյա գործադուլին միացել են Ryanair, Volotea, easyJet և Malta Air ավիաընկերությունների աշխատակիցները։
Իտալական Ita Airways ավիաընկերությունը հայտարարել է 122 չվերթի չեղարկման մասին, որը կազմում է կիրակի օրվա ընդհանուրի 40%-ը։ Բացի այդ, արհմիությունների տարածած հայտարարության համաձայն, աշխատանքերը կդադարեցնեն Իտալիայի քաղաքացիական ավիացիայի ազգային ծառայության (ENAV) ավիադիսպետչերները։
Ընդհանուր առմամբ, ավիացիոն ոլորտի աշխատակիցների բողոքի ակցիաները դժվարություններ կառաջացնեն 68000 ուղեւորների համար։ Corriere-ը նշում է, որ դրանք կարող էին ավելի մեծ լինել, եթե գործադուլի իրավունքը վերահսկող պետական գործակալությանը չհաջողվեր կրճատել բողոքի ակցիան 24 ժամից մինչև չորս ժամ։
Ցուցարարների հիմնական պահանջները վերաբերում են աշխատավարձերի բարձրացմանն ու աշխատանքային պայմանների փոփոխությանը։ Ներկայիս գործադուլը հերթական ակցիաներից մեկն է․ նախորդներն անցկացվել են հունիսի 8-ին և 25-ին։
