Բրիտանական խորհրդարանը մերժել է Բորիս Ջոնսոնի կառավարությանն անվստահություն հայտնելը

Համայնքների պալատը (Բրիտանական խորհրդարանի ստորին պալատը) հրաժարվել է աջակցել Բորիս Ջոնսոնի կառավարությանն անվստահության քվեին։ Քվեարկությանը դեմ է քվեարկել 349, կողմ՝ 238 պատգամավոր, հայտնում է The Guardian-ը։

Հունիսին բրիտանական խորհրդարանում նմանատիպ քվեարկություն է տեղի ունեցել՝ կապված անձամբ վարչապետի հետ։ Այն նույնպես ձախողվեց, սակայն հուլիսի սկզբին Ջոնսոնի կառավարությունը մոտ 50 մարդ լքեց, իսկ վարչապետը ստիպված եղավ հրաժարական տալ։ Նա Պահպանողական կուսակցության և կառավարության ղեկավարի պաշտոնը կզբաղեցնի այնքան ժամանակ, մինչև կուսակիցների կողմից նոր առաջնորդ ընտրվի: Սա պետք է տեղի ունենա սեպտեմբերին։

Reuters-ի փոխանցմամբ՝ Ջոնսոնի կառավարությանն անվստահություն հայտնելու վերաբերյալ քվեարկությունը նախաձեռնել է հենց կառավարությունը։ Սա արձագանք էր Լեյբորիստական ​​կուսակցության և այլ ընդդիմադիր ուժերի փորձերին՝ ստիպել Ջոնսոնի և նրա կաբինետի հրաժարականը հիմա՝ չսպասելով նոր խորհրդարանական ընտրությունների։

Քվեարկությունը ձախողվեց, քանի որ Պահպանողական կուսակցությունը, որը զբաղեցնում է Համայնքների պալատում տեղերի մեծամասնությունը, շահագրգռված չէ այժմ համընդհանուր ընտրությունների անցկացմամբ, մասնավորապես՝ կուսակցությունում առաջնորդի բացակայության պատճառով, գրում է The Independent-ը։

Աղբյուրը՝ Meduza.io

Թարգմանեց՝ Աստղ Խաչատրյանը