ԱԱԾ-ից անհետացած փաստաթղթերի մեծ մասը վերականգնվել է և կցվել Մարտի 1-ի գործի քննությանը

ԱԱԾ տնօրեն Արթուր Վանեցյանը՝ այսօր լրագրողների հետ ճեպազրույցում հայտնել է, որ Ազգային անվտանգության ծառայությունից անհետացած փաստաթղթերի մեծ մասը վերականգնվել է և կցվել Մարտի 1-ի գործի քննությանը։

«Փաստաթղթերի անհետացման հետ կապված իրականացվել է ծառայողական քննություն Ազգային անվտանգության ծառայությունում, փաստաթղթերի մեծ մասը վերականգնվել է, փոխանցվել Հատուկ քննչական ծառայություն և միացվել է Մարտի 1-ի գործի քննությանը»,- ասել է նա։

Հարցին, թե նոր հանգամանքներ ի հայտ եկե՞լ են այդ փաստաթղթերի վերականգնումից հետո, Վանեցյանը պատասխանել է, որ դրանց մեջ կային շատ հետաքրքիր փաստաթղթեր և կարծիք է հայտնել, որ նախաքննություն իրականացնող մարմինն առաջիկայում կհայտարարի այդ մասին:

Հիշեցնենք, որ ՀՀ վարչապետ Նիկոլ Փաշինյանն ավելի վաղ հայտարարել էր, որ նախորդ իշխանությունները հեռանալուց առաջ Ազգային անվտանգության ծառայությունից նյութեր են ոչնչացրել։