Միացյալ Նահանգների Սենատի արտաքին հարաբերությունների հանձնաժողովը հավանություն է տվել ՆԱՏՕ-ին Շվեդիայի և Ֆինլանդիայի անդամակցությանը։
Սկանդինավյան երկու պետությունների՝ Հյուսիսատլանտյան դաշինքին միանալու արձանագրությունները վավերացնելու մասին բանաձևը միաձայն հավանության է արժանացել հանձնաժողովի կողմից՝ գործնականում երաշխավորելով, որ Սենատի ամբողջական կազմը կհետևի այդ օրինակին: Ավելի վաղ նախագահ Ջո Բայդենը խնդրել էր սենատորներին արագ հաստատել փաստաթուղթը։
Հանձնաժողովի նախագահ, դեմոկրատ սենատոր Բոբ Մենենդեսը Ֆինլանդիայի և Շվեդիայի անդամակցությունն անվանել է «վերջին տարիների ամենակարևոր արտաքին քաղաքական հաջողություններից մեկը»:
Դաշինքի բոլոր 30 անդամները պետք է վավերացնեն երկու երկրների անդամակցությունը ՆԱՏՕ-ին։ Ակնկալվում է, որ ամբողջ գործընթացը կտևի առնվազն մեկ տարի:
Աղբյուրը՝ Azatutyun.am
