Ծխախոտ արտադրող Philip Morris-ը (Marlboro, Parlament, Bond, Chesterfield, L&M ապրանքանիշեր) ակնկալում է լքել ռուսական շուկան մինչև 2022 թվականի վերջ։ Այս մասին Bloomberg-ին տված հարցազրույցում հայտարարել է ընկերության գործադիր տնօրեն Յացեկ Օլչակը։
«Մենք քրտնաջան աշխատում ենք, որպեսզի դադարեցնենք մեր ներկայությունը Ռուսաստանում, բայց չեմ կարծում, որ դա տեղի կունենա հաջորդ եռամսյակում։ Ենթադրում եմ, որ մինչև տարեվերջ մենք կկարողանանք լքել Ռուսաստանը»,- ասել է Օլչակը։
Նա հավելել է, որ Philip Morris-ի ռուսական շուկան յոթերորդն է, իսկ ընկերության մասնաբաժինը, ըստ նրա, կազմում է 27%: Օլչակը նշել է, որ ընկերությունը որոշել է լքել Ռուսաստանը մատակարարման շղթաների և ֆինանսական գործարքների հետ կապված դժվարությունների պատճառով։
Մարտին Philip Morris-ը հայտարարեց, որ կկրճատի արտադրությունը և կդադարեցնի առաջիկա ներդրումները Ռուսաստանում: Հունիսին The Wall Street Journal-ը հայտնել էր, որ ընկերությունը մարտ ամսից փորձում է վաճառել իր բիզնեսը Ռուսաստանում և բանակցություններ է վարում գնման մեջ հետաքրքրված մատակարարների հետ:
Philip Morris-ը Ռուսաստանում ներկայացված է 1977 թվականից, երբ Marlboro ծխախոտները սկսեցին արտադրվել ԽՍՀՄ հինգ քաղաքներում, այդ թվում՝ Մոսկվայում։ Այժմ արտադրողը գործարան ունի Սանկտ Պետերբուրգում և վաճառքի գրասենյակներ մոտ 100 քաղաքներում։ Բացի ծխախոտից, ընկերությունը Ռուսաստանում արտադրում է IQOS ծխախոտի ջեռուցման համակարգեր։ Ռուսաստանում կա մոտ 3200 Philip Morris-ի աշխատակից։
Յեյլի համալսարանը գնահատում է, որ ավելի քան 1000 ընկերություններ որոշել են կրճատել իրենց գործունեությունը Ռուսաստանում փետրվարին Ուկրաինա ռուսական ներխուժումն սկսելուց հետո:
