ՀՀ էկոնոմիկայի նախարար Վահան Քերոբյանը մասնակցել է ԱՄՆ ՄԶԳ «Հայաստանի գործարար միջավայրի բարելավում» ծրագրի շրջանակում մշակված Ներդրումային բարեփոխումների ճանապարհային քարտեզի շնորհանդեսին։
Միջոցառման ընթացքում ԱՄՆ ՄԶԳ հայաստանյան առաքելության տնօրեն Ջոն Ալլելոն Վահան Քերոբյանին է հանձնել Ներդրումային բարեփոխումների ճանապարհային քարտեզը, որի հիմնական շահառուն է էկոնոմիկայի նախարարությունը։
«Տնտեսական բարեփոխումների մեր օրակարգում շատ կարևոր տեղ են գրավում ներդրումային բարեփոխումները, ՀՀ Կառավարությունը ձգտում է փոխել տնտեսության կառուցվածքը՝ սպառման վրա հիմնված տնտեսական աճից՝ անցում կատարելով ներդրումների վրա հիմնված տնտեսական աճի մոդելին։ Իսկ դա հնարավոր է հետևողական ներդրումային բարեփոխումների միջոցով»,- նշել է նախարարը։
