«Նախատեսում ենք 2023 թվականի վերելակների փոխարինման ծրագրի շրջանակներում բոլոր մրցույթներն ավարտել, որպեսզի արդեն հաջորդ տարվանից սկսեն աշխատել», – ասել է Երևանի քաղաքապետ Հրաչյա Սարգսյանը` քաղաքապետարանում աշխատանքային խորհրդակցության ժամանակ։
Հուլիսի 25-ի դրությամբ Երևանում վերելակների փոխարինման ծրագիրն իրականացվում է միանգամից 163 հասցեներում։
Սարգսյանն իր խորհրդական Կամո Արեյանին հանձնարարել է քաղաքի մյուս հատվածներում փոխարինման ենթակա վերելակների գույքագրում իրականացնել։
Նախնական տվյալներով` հաջորդ տարի կփոխարինվի 500 վերելակ, ևս 200–ի հարցը կախված է ֆինանսավորման ծավալից։
Վերելակների փոխարինման ծրագիրը Երեւանում մեկնարկել է 2 տարի առաջ` 2020 թ.։ Ընդհանուր առմամբ մայրաքաղաքում տեղադրվել է մոտավորապես 4600 վերելակ, որից 3500-ը փոխարինման կարիք ունի։ Յուրաքանչյուրի փոխարինումը 10 մլն դրամ արժե։
