Երևանում շուտով դռները կբացի «Հարդ Ռոք կաֆե»-ն

Շուտով Պուշկին 3/1 հասցեում իր դռները կբացի «Հարդ Ռոք կաֆե» Երևանը, որը, կարելի է ասել, միայն ռեստորան կամ սրճարան չէ, այն մի ամբողջ փորձառություն է, միջավայր, որը կապահովի բարձրակարգ սպասարկում՝ համապատասխանելով նորարարության բոլոր չափանիշներին: Նախաձեռնողների խոսքով՝ այն կներմուծի նոր որակ, կձևավորի սպասարկման նոր, առավել կատարելագործված մշակույթ:

«Արմենպրես»-ի հաղորդմամբ՝ ԱՆԻՖ-ի «Ձեռնարկատեր+ պետություն» ներդրումային ֆոնդի տնօրեն Բելլա Մանուկյանը նշեց՝ այս ծրագրի ներդրման արդյունքում ստեղծելու են մոտավորապես 100 մշտական աշխատատեղ  և նոր որակ ու մշակույթ են բերելու Հայաստանում հյուրընկալության ոլորտին: 

«ԱՆԻՖ»-ի ներքո գործող «Ձեռնարկատեր պետություն» ֆոնդը մասնակցություն է ունեցել  «Հարդ Ռոք կաֆե» Երևանի բացմանը՝ ներդնելով շուրջ 500 հազար ԱՄՆ դոլար: Ներդրումն իրականացվել է ԱՆԻՖ-ի դուստր ընկերության կողմից՝ ֆոնդի շրջանակներում»,- նշեց Մանուկյանը: 

Ֆոնդի տնօրենի խոսքով՝ շուրջ երկու տարի է «Դոմ Արենա» ընկերության հետ աշխատում են ներդրումային ծրագրի մեկնարկի ուղղությամբ: Կարևորում են, որ իրենց ներդրման  արդյունքում իրականացվեն այնպիսի ծրագրեր, որոնց շնորհիվ կստեղծվի հավելյալ տնտեսական էֆեկտ:

«Դոմ Արենա» ընկերության տնօրեն Արսեն Հովհաննիսյանն ընդգծեց՝  ընդհանուր առմամբ 2 միլիոնից ավել ներդրում է իրականցվել: Վստահեցնում է՝ «Հարդ Ռոք կաֆե»- Երևանն այցելուների համար տպավորությունների գեներատոր է լինելու:  

«Այստեղ հնարավոր կլինի լսել որակյալ երաժշտություն: Սրճարանը հագեցած է ժամանակակից տեխնիկայով: Այն առանձնանում է նաև իր խոհանոցով, առանձնապես ընդգծվում են ամերիկյան և մեքսիկական ուտեստները: Սրճարանում հնարավոր է գտնել այնպիսի հայտնի արտիստներին պատկանող իրեր, ինչպիսիք են Մայքլ Ջեքսոնը, Շերը և այլք»,- առանձնացրեց նա: 

«Հարդ Ռոք կաֆե» տարածաշրջանային ցանցի տնօրեն Ալբերտ Ռոդրիգեսն ընդգծեց՝ ուրախ է, որ Երևանում նման սրճարան է բացվելու: Հավատացած է, որ յուրահատուկ ճարտարապետություն և յուրահատուկ տեղ է ընտրված «Հարդ Ռոք կաֆե» Երևանի համար: 

Սրճարանի բացման հստակ ամսաթիվ դեռևս չի նշվում:

Առաջին «Հարդ Ռոք Կաֆեն» բացվել է Լոնդոնում 1971 թ.: Ներկայումս ցանցը գործում է ավելի քան 70 երկրներում: Ծրագիրը համաֆինանսավորվում է ԱՆԻՖ-ի կողմից՝ 48% մասնակցության չափով։ ԱՆԻՖ-ը ծրագրին մասնակցում է Covid-19-ի տնտեսական հետևանքների մեղմման նպատակով ստեղծված դուստր ընկերության հակաճգնաժամային ֆոնդի ծրագրերի շրջանակներում։

Լուսանկարները՝ Արմենպրեսի։