Բարձրագույն դատական խորհրդի դատավոր անդամ ընտրվեց Նաիրա Հովսեփյանը։ Այս մասին հայտնում է ԲԴԽ մամուլի խոսնակ Լիլիթ Շաբոյանը։
Հիշեցնենք, որ Երևան քաղաքի ընդհանուր իրավասության դատարանի Աջափնյակ 1 նստավայրում ընթանում էր դատավորների ընդհանուր ժողովը: Օրակարգում Բարձրագույն դատական խորհրդի դատավոր անդամի ընտրության հարցն էր:
Որպես ԲԴԽ անդամի թեկնածու առաջադրված էին Սյունիքի մարզի ընդհանուր իրավասության դատարանի դատավոր Անահիտ Թումանյանը, Շիրակի մարզի ընդհանուր իրավասության դատարանի դատավոր Լիլիթ Խաչատրյանը, Երևանի ընդհանուր իրավասության դատարանի դատավորներ Նաիրա Հովսեփյանը և Գայանե Մազմանյանը:
Նաիրա Հովսեփյանը 1991 թվականից դասախոսել է ԵՊՀ իրավաբանական ֆակուլտետում։
1996 թվականին նշանակվել է Էրեբունի շրջանային ժողդատարանի դատավոր։
1999 թվականին ՀՀ Նախագահի հրամանագրով նշանակվել է Շենգավիթ վարչական շրջանի ընդհանուր իրավասության դատարանի դատավոր:
ՀՀ ԱԺ կողմից 2017 թվականի դեկտեմբերի 21-ի թիվ ՀՕ-34-Ն օրենքի համաձայն շարունակում է պաշտոնավարել Երևան քաղաքի ընդհանուր իրավասության դատարանի դատավորի պաշտոնում:
