Մինչ այս պահը Հայաստանում կապիկի ծաղիկի որևէ դեպք չի գրանցվել, այսօր լրագրողների հետ ճեպազրույցում ասաց առողջապահության նախարարը։
Անահիտ Ավանեսյանը հաստատեց՝ Հայաստանը Ռուսաստանից կապիկի ծաղիկի թեստավորման հավաքածու է ստացել։
Երեկ ռուսական ՏԱՍՍ գործակալություն էր հայտնել, որ Հայաստանը Ռուսաստանից ստացել է երկու թեստային համակարգ, որը թույլ է տալիս 200 թեստ իրականացնել՝ կապիկի ծաղիկն ու ջրծաղիկը հայտնաբերելու համար։
«Այո՛, մենք Ռուսատանի Դաշնությունից ստացել ենք կապիկի ծաղիկի թեստավորման հավաքածուները և մշտապես ցանկացած կասկածի պարագայում միանշանակ օգտագործում ենք։ Մինչ այս պահը իրականացրած հետազոտությունների արդյունքները բացասական են եղել և Հայաստանում որևէ դեպք չի գրանցվել», – ասաց նախարարը։
Անդրադառնալով կորոնավիրուսի դեպքերին՝ Ավանեսյանը նշեց, որ հիվանդացության աճ կա, այս պահին Հայաստանում շրջանառվում է BA․5 ենթատեսակը, որը «օմիկրոնի» ենթաշտամներից է։
«Քովիդն այլևս դառնում է էնդեմիկ հիվանդություն, և ժամանակ առ ժամանակ մենք ունենալու ենք բռնկումներ աշխարհի տարբեր հատվածներում։ Տուրիստական բավական բուռն շրջան է, մարդիկ ճամփորդում են և, իհարկե, պետք է նաև Հայաստան ներթափանցեր արդեն որերորդ անգամ վարակը։ Պիտի շարժվենք ըստ համաճարակային իրավիճակի, և մենք պատրաստ են հաջորդիվ ալիքներին․ եթե համաճարակային իրավիճակը սրվի, մենք բոլոր մեր գործիքկազմը կիրառելու ենք՝ պայքարելու համաճարակի դեմ», – ասաց նախարարը։
