Հուլիսի 28-ի երեկոյան Մոսկվայի Ալմա-Ատինսկայա փողոցի հանրակացարանում հրդեհ է բռնկվել։ Ութ մարդ զոհվել է, ևս չորսը՝ վիրավորվել, գրում է Интерфакс-ը՝ ԱԻՆ-ին հղումով։
ՏԱՍՍ-ի փոխանցմամբ՝ արտակարգ ծառայությունները հրդեհի մասին տեղեկություն են ստացել Մոսկվայի ժամանակով 23։47-ին։ Ժամը 00:47-ին հրդեհը մարվել է։ Հրդեհի մակերեսը կազմել է 150 քմ։ Ըստ նախնական վարկածի հրդեհը կարող էր առաջանալ անսարք էլեկտրական սարքավորումների պատճառով, գրում է ՌԻԱ Նովոստին։
Արտակարգ իրավիճակների նախարարության հաղորդագրության համաձայն՝ հանրակացարանում հրդեհի ազդանշանը չի աշխատել, իսկ պատուհաններին փակցված ճաղավանդակները խոչընդոտել են մարդկանց փրկելուն։ Միևնույն ժամանակ, ՏԱՍՍ-ի աղբյուրը պարզաբանել է, որ բոլոր մահացածները գտնվել են նույն սենյակում և մահացել են այրման արտանետման թունավորումից։ Հնարավոր է, որ հրդեհի բռնկման ժամանակ նրանք քնած են եղել։
Ըստ «Կոմերսանտ»-ի՝ հանրակացարանում հիմնականում բնակվում էին մոտակայքում գտնվող Մոսկվայի առևտրա-տոնավաճառային համալիրի և Սադովոդ շուկայի բանվորներն ու վաճառողները: Բոլոր մահացածները միգրանտներ են, ՏԱՍՍ-ին հայտնել է աղբյուրը։
Հրդեհի փաստով հարուցվել է քրեական գործ՝ անվտանգության պահանջներին չհամապատասխանող ծառայություններ մատուցելու դեպքի առթիվ։ Նախկինում հանրակացարանում բազմիցս հայտնաբերվել են հրդեհային անվտանգության խախտումներ, հանրակացարանի ղեկավարությունը խախտումները վերացնելու հրամաններ է ստացել, հայտնում են ԱԻՆ-ից։
Թարգմանեց՝ Աստղ Խաչատրյանը
