Ռուսական «Գազպրոմը» այսօր առավոտյան դադարեցրել է գազի մատակարարումը Լատվիա՝ «գազի դուրսբերման պայմանների խախտման պատճառով»։ Այս մասին հայտնում է «Ազատության» ռուսական ծառայությունը՝ հղում անելով РИА Новости-ին։
Նախօրեին լատվիական Latvijas Gaze ընկերությունը հայտարարել էր, որ սկսել է ռուսական գազ գնել միջնորդի միջոցով։ Ընկերության ղեկավար Այգարս Կալվիտիսը չի նշել նոր մատակարարի անունը։ Ըստ Կալվիտիսի, ընկերությունը հնարավորություն չունի գազ գնել անմիջապես «Գազպրոմ»-ից, քանի որ դրա դիմաց վճարումը ռուբլով է։
Մարտի վերջին Ռուսաստանի նախագահ Վլադիմիր Պուտինը հայտարարել է, որ ռուսական գազի դիմաց «ոչ բարեկամական երկրները» պետք է վճարեն ռուբլով։ Մոսկվան այդ ցանկում շուրջ հինգ տասնյակ երկիր է ներառել՝ հիմնականում արևմտյան պետություններ, որոնք պատժամիջոցներ են սահմանել Ռուսաստանի դեմ։
