ԱՄՆ իշխանությունները կարծում են, որ ռուս զինվորականները սկսել են իրանական «Շահեդ-191» և «Շահեդ-129» հարվածային անօդաչու թռչող սարքերի ուսուցումը։ Այս մասին հայտնում է CNN-ը՝ վկայակոչելով ԱՄՆ անանուն պաշտոնյային։ Հեռուստաալիքը պնդում է, որ այն, ինչ տեղի է ունենում, հաստատում է Ռուսաստանի՝ այդ անօդաչու թռչող սարքերը գնելու մտադրության մասին։
«Վերջին մի քանի շաբաթվա ընթացքում Ռուսաստանի ներկայացուցիչները վարժանքներ են անցկացնում Իրանում՝ Իրանից Ռուսաստան անօդաչու թռչող սարքերի տեղափոխման համաձայնագրի շրջանակներում», – ասել է պաշտոնյան։ Նա նաև նշել է, որ զորավարժությունների վերաբերյալ հետախուզական տվյալները վերջերս են գաղտնազերծվել։
CNN-ն ավելի վաղ հայտնել էր, որ ռուսական պատվիրակությունը հունիսին և հուլիսի սկզբին առնվազն երկու անգամ այցելել է իրանական Քաշանի օդանավակայան՝ ծանոթանալու «Շահեդ-191» և «Շահեդ-129» անօդաչու թռչող սարքերին, որոնք երկուսն էլ կարող են ճշգրիտ կառավարվող հրթիռներ կրել: ԱՄՆ ազգային անվտանգության հարցերով խորհրդական Ջեյք Սալիվանն ասել է, որ Իրանի կառավարությունը պատրաստվում է Ռուսաստանին տրամադրել մի քանի հարյուր անօդաչու թռչող սարքեր, այդ թվում՝ մարտական մոդելներ։
Թեհրանը հերքել է Մոսկվային անօդաչու սարքերի մատակարարումը։ Հուլիսի 15-ին Իրանի արտաքին գործերի նախարար Հոսեյն Ամիր Աբդոլլահյանը իր ուկրաինացի գործընկեր Դմիտրի Կուլեբայի հետ հարցազրույցում այդ մասին տեղեկությունները «անհիմն» է անվանել։ Ռուսաստանի Դաշնության նախագահի մամուլի քարտուղար Դմիտրի Պեսկովը հրաժարվել է մեկնաբանել իրանական անօդաչու թռչող սարքերի գնման մասին լրագրողների հարցը։
Աղբյուրը՝ Meduza.io
