Ամերիկյան հետախուզական ծառայություններն արձանագրել են, որ ԱՄՆ-ում սկսել են սպառնալ իրավապահ և դատական պաշտոնյաներին, ինչպես նաև գործադիր իշխանության ներկայացուցիչներին՝ նախկին նախագահ Դոնալդ Թրամփի տանը խուզարկությունից հետո։
Fox News-ի փոխանցմամբ՝ այս մասին ասվում է Հետաքննությունների դաշնային բյուրոյի (ՀԴԲ) և Ներքին անվտանգության դեպարտամենտի (DHS) ամփոփագրում, որն ուղարկվել է այլ գերատեսչություններ։
Խուզարկությանը հաջորդած օրերի ընթացքում, ըստ Fox News-ի, իրավապահները սկսել են բռնության մասին ավելի շատ հաղորդումներ ստանալ, որոնցից մեկում սպառնացել են «կեղտոտ ռումբ» թողնել ՀԴԲ-ի կենտրոնակայանի մոտ:
Բացի այդ, սոցիալական ցանցերում «քաղաքացիական պատերազմի» և «զինված ապստամբության» կոչերն ավելի հաճախակի են դարձել, ասվում է ՀԴԲ-ի և DHS-ի զեկույցում։ Միևնույն ժամանակ, բազմաթիվ սպառնալիքներ պարունակում են պնդումներ, որ 2020 թվականի նախագահական ընտրությունների արդյունքները կեղծվել են։
Օգոստոսի 8-ին ԱՄՆ Հետաքննությունների դաշնային բյուրոն գրոհել է ԱՄՆ 45-րդ նախագահ Դոնալդ Թրամփի կալվածքը Ֆլորիդայի Մար-ա-Լագոյում։ Ըստ Politico-ի՝ խուզարկությունն անցկացվել է արդարադատության գործին խոչընդոտելու և լրտեսության մասին օրենքի հնարավոր խախտման հետ կապված։ Խուզարկության ժամանակ ՀԴԲ-ն Թրամփի տնից առգրավել է գաղտնի փաստաթղթերի 11 հավաքածու, նախկին նախագահը պահանջել է վերադարձնել դրանք։
Աղբյուրը՝ Meduza.io
Թարգմանեց՝ Աստղ Խաչատրյանը
