Հաշվի առնելով 2020 թվականի Արցախյան 2-րդ պատերազմով պարտադրված նոյեմբերի 9-ի հայտարարության դրույթները, որոնք հայտարարության հաջորդ իսկ պահից բազմաթիվ անգամներ անմարդկայնորեն խախտել է Ադրբեջանի Հանրապետությունը, և որոնք արձանագրվել են Լեռնային Ղարաբաղ Հանրապետության, Հայաստանի Հանրապետության, միջազգային կառույցների, ընդհուպ, որոշ խախտումներ նաև արձանագրվել են Ռուսաստանի Դաշնության ներկայացուցիչների կողմից,
Հաշվի առնելով 2020 թվականի նոյեմբերի 9-ի պարտադրված հայտարարության Ադրբեջանի կողմից 6-րդ կետի խախտմամբ Լաչինի միջանցքում գտնվող՝ Բերձոր, Աղավնո և Սուս համայնքների շուրջ ստեղծված իրավիճակը, որը նպատակ է հետապնդում խաթարելու Լեռնային Ղարաբաղը (Արցախի Հանրապետություն) Հայաստանին միացնող Լաչինի մարդասիրական միջանցքի բնականոն աշխատանքն ու կարգավիճակը, ինչի հետևանքով ԼՂ-ն կարող է հայտնվել լիակատար շրջափակման մեջ,
Հաշվի առնելով Արդբեջանի կողմից շարունակվող հայատյաց, ահաբեկումներով, սպանություններով, պատանդներ վերցնելով իրականացվող ռազմականացված քաղաքականությունը, այդ թվում՝ ուղղված Լեռնային Ղարաբաղի և Լաչինի մարդասիրական միջանցքում ապրող խաղաղ բնակչության դեմ, ինչպես նաև մահաբեր ԱԹՍ-ներով հարձակումները ԼՂ օրինական զինված ուժերի վրա,
Հաշվի առնելով Ռուսաստանի Դաշնության կողմից խաղաղապահ առաքելություն իրականացնող ուժերի փաստացի անգործությունը և ուշացած արձագանքը Ադրբեջանի կողմից էթնիկ զտումներին, հայ բնակչության սպանություններին, ունեզրկումներին, հողազավթումներին, ահաբեկչություններին, պատանդառություններին,
Պահանջում ենք Ռուսաստանի Դաշնության կառավարությունից՝
-Իրականացնել 2020 թվականի նոյեմբերի 9-ի ստանձնած պարտավորությունները,
-Իրականացնել ռազմագերիների, պատանդների և պահվող այլ անձանց ու մահացածների մարմինների ամբողջական վերադարձը,
-Վերականգնել նոյեմբերի 9-ի հայտարարությամբ նախատեսված Լեռնային Ղարաբաղի (Արցախի Հանրապետություն) և Ադրբեջանի միջև շփման գիծը,
-Բացառել նոր ռազմական էսկալացիաները,
-Բացառել Լեռնային Ղարաբաղի համար կենսական նշանակություն ունեցող Լաչինի մարդասիրական միջանցքի կարգավիճակի խաթարումը։ Միայն կողմերի փոխադարձ համաձայնությամբ կարող է Լաչինի միջանցքով անցնող նոր երթուղու փոխփոխություն իրականացվել՝ երթուղին լիարժեք պատրաստ լինելուց հետո:
Հակառակ դեպքում կասկածի տակ է դրվում ռուսական խաղաղապահ առաքելության նպատակահարմարությունը և Ռուսաստանի Դաշնության հեղինակությունը։
«Արցախի Հանրապետության ճանաչում» քաղաքացիական նախաձեռնություն
