Գերմանիայի կանցլեր Օլաֆ Շոլցը դեմ է արտահայտվել ռուսաստանցիների համար Շենգենյան գոտու վիզաների տրամադրման արգելքին։ Նրա խոսքով՝ Եվրոպան պետք է հնարավորություն տա հեռանալ Պուտինի քաղաքականությանը դեմ արտահայտվողներին։
«Բոլոր որոշումները, որոնք մենք ընդունում ենք, չպետք է դժվարացնեն նրանց ազատություն գտնելը և հնարավորությունը լքելու երկիրը՝ փախչելով Ռուսաստանի բռնապետությունից: Սա ռուս ժողովրդի պատերազմը չէ, սա Պուտինի պատերազմն է», – ասել է Շոլցը:
Միևնույն ժամանակ, Ֆինլանդիայի արտգործնախարարությունը հայտարարել է, որ կնվազեցնի ռուսաստանցիներին վիզաների տրամադրումը և առաջնահերթությունը կտա նրանց, ովքեր աշխատանքի կամ ուսման համար կդիմեն շենգենյան վիզա ստանալու։ Նախատեսվում է 5-10 անգամ կրճատել վիզաների տրամադրումը։
Եվրոպայում շարունակվում է քննարկումը պատերազմի ֆոնին ռուսաստանցիներին շենգենյան վիզաների տրամադրման հնարավոր արգելքի թեմայով։ Լատվիան, Էստոնիան, Լիտվան և Ֆինլանդիան կողմ են համաեվրոպական արգելքին։
