Հրավառությունների կազմակերպման կարգի խստացման նախագիծը կքննարկվի ԱԺ արտահերթ նիստում. Ավինյան

Այսօր «Սուրմալու» առևտրի կենտրոն էր եկել ՀՀ նախկին փոխվարչապետ Տիգրան Ավինյանը: Անդրադառնալով առևտրի կենտրոնում եղած դեպքին, Ավինյանը նշել է, որ պետք է կարողանանք հրաժարվել մասնավոր միջոցառումների ժամանակ հրավառություններ անելու մշակութից, քանի որ դրանք ոչ միայն խախտում են մոտակայքում ապրող մարդկանց անդորրը, այլեւ մեծ վտանգ են ներկայացնում։

«Որոնողական աշխատանքները գրեթե ավարտին են հասնում։ Ընդամենը մեկ անհետ կորած անձ կա: Կոնկրետ տեղանքը արդեն ֆիքսված է և այդ հատվածում շարունակվում են որոնողական աշխատանքները։ Տեղի ունեցած ողբերգությունը կարծում եմ՝ շատ սթափեցնող և ցավալի բան էր, որը տեղի ունեցավ, և սա առիթ է տալու մտածելու նմանատիպ նյութերի պահպանման վերաբերյալ, սա առիթ է տալու մտածելու մեր մշակույթում, մեր ծնունդներին, կնունքներին, հարսանիքներին հրավառության օգտագործման մասին»,- ասել է Տիգրան Ավինյանը:

Նախկին փոխվարչապետը հայտնել է նաև, որ հարցը քննարկել է իշխող խմբակցության պատգամավոր Սիսակ Գաբրիելյանի հետ, և հարցը արտահերթ կերպով կքննարկվի սեպտեմբերին գումարվող նստաշրջանում.«Մենք ուղղակի պետք է գիտակցենք, որ պարտադիր չէ մեր մասնավոր միջոցառումներին մասնակցեն շրջակա 10 կմ հեռավորության վրա գտնվող քաղաքացիները, հատկապես, որ նրանց թվում կան ծերեր և մանկահասակ երեխաներ։ Անգամ, եթե այդ պայթյունները լինում են մինչև ժամը 23։00-ն, խախտում են այդ քաղաքացիների անդորրը։ Այստեղ միայն ժամերի հարցը չէ»:

Վերջինիս կարծիքով այս պայթյունը որևէ տեռորիստական ակտի հետ կապ չունի.«Քրեական գործը կարծում եմ կբացահայտի՝ ինչ է տեղի ունեցել, բայց մոտավորապես 4 տոննա հրավառական նյութերի պահպանումը որևէ մի տեղ և մի փոքր կայծը նմանատիպ հետևանքներ կարող է ունենա»:

Հարցադրմանն ինքն այսօր այստեղ է որպես իշխող ուժի քաղաքապետի թեկնածո՞ւ, Տիգրան Ավինյանը պատասխանել է.«Այստեղ եմ որպես «Քաղաքացիական պայմանագիր» վարչության անդամ, ինչպես նաև որպես ՔՊ քաղաքապետի թեկնածու»: