Թուրքիայի շրջաններից մեկի ղեկավարի պաշտոնում հայ է նշանակվել

«Առաջին անգամ Թուրքիայի պատմության մեջ երկրի գավառներից մեկի վարչակազմի ղեկավարի պաշտոնում հայ է նշանակվել», – գրում է թուրքական Hurriyet-ը՝ վկայակոչելով Ստամբուլում լույս տեսնող երկլեզու «Ակոս» պարբերականը։

Թերթի տեղեկություններով՝ Դենիզլի նահանգի Բաբադաղ գավառի վարչակազմի ղեկավարի պաշտոնում նշանակվել է 27-ամյա Բերք Աջարը։

«Այս պաշտոնին նշանակվելու համար Աջարը մասնակցել է քննությունների մի քանի փուլերի։ Գրավոր քննության ընթացքում, որին մասնակցել է ավելի քան 13 հազար մարդ, Աջարը զբաղեցրել է 72-րդ տեղը։

Վարչակազմի ղեկավարի պաշտոնում նրա նշանակման մասին որոշումը, սակայն, կայացվել է բանավոր քննության արդյունքների հիման վրա։ Դրան մասնակցել է 472 հավակնորդ», – գրում է Hurriyet-ը:

Թերթի տեղեկություններով՝ նորանշանակ պաշտոնյան ավարտել է Ստամբուլի Սահակյան-Նունյան հայկական դպրոցն, ինչպես նաև Բիլգի համալսարանի իրավաբանության ֆակուլտետը։

Աղբյուրը՝ Azatutyun.am