Իրանը հրաժարվել է միջուկային գործարքի վերականգնման համար ԱՄՆ պետքարտուղարության ահաբեկչական կազմակերպությունների ցուցակից Իսլամական հեղափոխության պահապանների կորպուսը (ԻՀՊԿ) հանելու և այդ կարգավիճակով նախատեսված պատժամիջոցները վերացնելու պահանջից: Այդ մասին հայտնել է CNN հեռուստաալիքը՝ վկայակոչելով ԱՄՆ բարձրաստիճան պաշտոնյայի:
«Համաձայնագրի վերջին տարբերակը չի պարունակում այդ պահանջը: Հենց դրա շնորիվ է հաջողվել մոտենալ համաձայնության կնքմանը»,- ասել է հեռուստաալիքի զրուցակիցը: Ավելի վաղ ԱՄՆ վարչակազմի ներկայացուցիչներն Իրանի այդ պահանջը համարում էին բանակցությունների գլխավոր վիճելի պահերից մեկը:
CNN-ի զրուցակիցը, սակայն, միանշանակ վստահություն չի հայտնել, որ այժմ համաձայնություն ձեռք կբերվի։ Ակնկալվում է, որ միջուկային գործարքի վերականգնման մասին վերջնական որոշումը կողմերը կարող են ընդունել առաջիկա օրերին:
