Վերջին տարիներին հայաստանյան տեղեկատվական դաշտում ֆեյք նյուզ շրջանառող լրատվականների շղթան պարբերաբար թիրախավորում է Խաչատուր Սուքիասյանին՝ նրա անունն ամեն անգամ կապելով որևէ ֆանտասմագորիկ իրադարձության հետ։ Եվ որքան էլ ամեն անգամ մասնավոր դեպքերը հրապարակ նետվելու պահից էլ հերքման արժանի չեն լինում՝ Սուքիասյանի համբավն ու հեղինակությունը սևացնելու առաջադրանք ստացած մեքենան ոչինչ չի խնայում՝ նոր, ավելի մասշտաբային, և հանրության զգայուն լարերի վրա ազդող նոր կեղծիքներ հորինելու համար։
- Ինչու՞ է հայտնի շրջանակների քաղաքական շահերը սպասարկող դեղին մամուլը պարբերաբար թարմ պահում Սուքիասյանի անունը շրջանառող ֆեյք նյուզը:
- Ինչու՞ է թիրախավորվում հենց Խաչատուր Սուքիասյանը։
- Ի՞նչը չեն ներում նրան։
Խաչատուր Սուքիասյանը, ում անունը անկախությունից ի վեր միշտ ասոցացվել է ձեռնարկատիրության և հաջողված բիզնես նախագծերի հետ, իր ընտանիքի հետ միասին ծավալած գործունեությամբ զարգացրել է Հայաստանի տնտեսությունը։ Բիզնեսի տրամաբանությամբ հաջողություններ գրանցած և բարի համբավ ունեցող գործարարի կերպարն անընդունելի դարձավ նրանց համար, քանի որ չունեին իրենցից կախվածության մեջ պահելու հնարավորություն։
Այսուհանդերձ՝ Սուքիասյանը միշտ աջակցել է Հայաստանում ժողովրդավարության և ազատ կամարտահայտման համար մղվող բոլոր մեծ կամ փոքր շարժումներին՝ չխորշելով իր նկատմամբ իշխանական շրջանակների լարումներից՝ և դրան հետևանքներից։ 2008-ին Սուքիասյանի աջակցությունը ժողովրդական շարժմանը նրա ընտանիքի համար ահռելի ֆինանսական կորուստներ արժեցավ։ Քոչարյանը չէր կարող հանդուրժել ժողովրդական շարժմանը բիզնեսի այդպիսի խոշոր ներկայացուցչի բացահայտ աջակցությունը, և Բջնի հանքային ջրերի գործարանը և «Ֆիլիպ Մորիս Արմենիա»-ն ապօրինի գործընթացների արդյունքում օտարվեցին իսկական սեփականատիրոջից՝ Սուքիասյան ընկանիքից։ Սուքիասյանի հետ քոչարյանամերձ մեդիայի հաշիվները, ինչպես տեսնում եք, հին են և պարզունակ՝ իրենց էությամբ։
Համաժողովրդական շարժմամբ մերժված, բայց դեռևս իշխանության վերադառնալու մոլուցքով տարված քաղաքական շրջանակների համար Սուքիասյանին չներելու, և նրա նկատմամբ ատելությունն ու թշնամանքն ավելի բորբոքելու առիթ հանդիսացավ իշխող քաղաքական թիմի ցանկում ԽԱՉԱՏՈՒՐ ՍՈՒՔԻԱՍՅԱՆ անվան հայտնվելը, որն իր ներկայությամբ նոր կշիռ ու վստահություն բերեց իշխանություններին․ ընդ որում՝ դա տեղի ունեցավ այնպիսի ճգնաժամային և իշխող ուժի հեղանակության համար ամենախոցելի և ծայրահեղ դժվար ժամանակաշրջանում, որը կարող էր ճակատագրական դառնալ՝ բոլոր իմաստներով և բոլորի համար՝ երկրում հնարավոր անիշխանության պարագայում իշխանազավթման հնարավորություն տալով նախկիններին։ Իսկ Սուքիասյանի՝ իշխանությունների կողքին կանգնելն ինչ-որ առումով բալանսավորեց քաղաքական ուժի դիրքերն ու հեղինակությունը, բարձրացրեց հանրության վստահությունը Հայաստանի տնտեսական և քաղաքական ապագայի նկատմամբ։
Սա դարձավ նոր, ևս մեկ աններելի պատճառ՝ Սուքիասյանին պահելու մշտական հարվածային թիրախում։ Ի հեճուկս տեղեկատվական փոշու մեջ Սուքիասյանի՝ «իշխանական օլիգարխ» լինելու կեղծ նարատիվներին, Սուքիասյան ընտանիքը չօգտագործեց որևէ լծակ կամ արտոնություն՝ հայտնի գործերով պրոցեսները արագացնելու, կամ ինչպես իրենք կանեին՝ չգնաց մեկ գիշերվա մեջ հարցերը լուծելու ճանապարհով։
Պետության, պետականաության մասին նախկինների և ներկաների մեջ կա մեծ արժեհամակարգային անջրպետ, և թիրախավորված ֆեյք նյուզն ամեն անգամ դա ավելի արտահայտիչ է դարձնում։
Էդգար Բաբայան
