Օգոստոսի 22-ին ՀՀ Ազգային ժողովում մեկնարկել է «Ամառային դպրոց» ծրագիրը: Ծրագրին մասնակցում է մրցութային փուլը հաղթահարած Հայաստանի Հանրապետության ավագ դպրոցների շուրջ 48 աշակերտ: Այս մասին տեղեկացնում են Ազգային ժողովից։
Օրերը, որոնք անցկացնելու եք Ազգային ժողովում, ձեզ համար կլինեն վճռորոշ. դուք ձեր ապագան կերտելու լավագույն հնարավորությունն ունեք. ասել է ՀՀ ԱԺ աշխատակազմի ղեկավար-գլխավոր քարտուղար Վահան Նարիբեկյանը՝ ողջունելով «Ամառային դպրոց» ծրագրի մասնակիցներին խորհրդարանում: Նա տեղեկացրել է աշակերտներին, որ Հայաստանի Ազգային ժողովի շենքն աշխարհում օրենսդիր մարմինների ամենագեղեցիկ կառույցներից չորրորդն է:
Դասընթացների ընթացքում աշակերտները կհանդիպեն պատգամավորների, քաղաքական եւ հանրային հեղինակություն ունեցող անձանց, ԱԺ աշխատակազմի բնականոն գործունեությունն ապահովող ստորաբաժանումների աշխատակիցների հետ:
«Ամառային դպրոց» ծրագիրն իրականացվում է ՄԱԶԾ «Նոր Հայաստան՝ ժամանակակից խորհրդարան» ծրագրի աջակցությամբ, որը ֆինանսավորվում է Շվեդիայի կառավարության կողմից:
