ԱԻՆ Փրկարար ծառայության ղեկավարի տեղակալ Հովհաննես Եմիշյանը այսօր լրագրողների հետ զրույցում անդրադառնալով այն հարցին, որ «Սուրմալու» առևտրի կենտրոնի շենքը արդեն 8 օր է վթարային վիճակում է և չի վնասազերծվում, հայտնեց, որ վտանգավոր մի շարք կոնստրուկացիաներ են եղել, որոնք իրենք վերացրել են:
«Ամեն օր մենք վտանգները վերացրել ենք, այս պահին փլուզման վտանգ չկա, դեռ որոնողական աշխատանքներ ենք իրականացնում»,-ասել է նա:
Խոսելով մեկ անհետ կորած քաղաքացու մասին, Եմիշյանը փոխանցել է, որ ենթադրյալ հնարավոր վայրում իրենք փնտրել են մասունքներ, սակայն դեռ չեն գտել: Նա հավելեց՝ բոլոր հատվածներում, որտեղ հնարավոր է, որ քաղաքացին լիներ, որոնումներ իրականացվել են, այդ թվում՝ նկուղի հատվածում, առաջին հարկում։
«Ինչ վերաբերում է պահեստային հատվածին, ապա 20 ժամից ավելի հրդեհաշիջում էինք անում, քանի որ 500-1000 աստիճան տաքություն է եղել»,–ասաց ՓԾ տնօրենի տեղակալը։
Ճշտող հարցին՝ այսինքն, չի բացառվում, որ քաղաքացու մարմինը մոխրացա՞ծ լինի, Հովհաննես Եմիշյանը դրական պատասխան է տվել:
Այնուհանդերձ, մինչ այս պահը, Եմիշյանի խոսքով, որոնողափրկարարական աշխատանքները շարունակվում են․ «Եթե անգամ 1 տոկոս հավանականություն կա նրան գտնելու, աշխատանքները չեն դադարեցվելու»։
Պաշոտնյան փոխանցել է, որ այս պահին դեպքի վայրում աշխատում են ԱԻՆ-ի կինոլոգները, ընթացքում կամավորները նույնպես օգնել են:
Հարցադրմանը՝ կամավորներն ավելի շատ օգնո՞ւմ էին, թե՞ խանգարում, Եմիշյանը նշել է՝ կային շատ բարձր պատրաստված կամավորներ, օրինակ «Կարմիր խաչի» ներկայացուցիչները.«ՈՄԱ-ն նույնպես կազմակերպված էր, չնայած նրանք փրկարարության աշխատանքին չէին տիրապետում, սակայն շատ պատրաստակամ էին: Իրենք կազմակերպված ամեն բան կարողանում էին անել: Բայց մարդիկ էլ կային կամավորի անվան տակ խանգարում էին աշխատանքներին: Օրինակ՝ գալիս էին առանց համապատասխան հագուստի և այս ընթացքում ձեռք էին բերում տարբեր վնասվածքներ: Ստացվում է՝ կամավորը եկել էր օգնելու, բայց դարձել էր տուժող: Մեկ գիշերում ունեցել ենք 130 հոգի տուժող: Բուժօգնություն տվել են այդ մարդկանց մեր բժիշկները և «Կարմիր խաչի» կամավորները: Վերջիններս փոխարենը դեպքւ վայրի մարդկանց օգնեին, եկել կամավորներին էին օգնում»:
Եմիշյանի խոսքով՝ անկազմակերպ վիճակը եղել է միայն առաջին օրը, դա էլ եղել է տեղում շատ մարդկանց խնդրի պատճառով.«Լռության րոպե էինք հայտարարում, հետո 3 րոպե բղավում էինք, որ լռություն լինի, բայց դա ընդամենը մեկ օր տևեց: Կամավորներ կային չէին ենթարկվում հրահանգներին, իրենց թվում էր ավելի շատ բան գիտեն: Պետք է կամավորները թրեյնինգներ անցնեն, որպեսզի ավելի շատ օգնեն, քան՝ խանգարեն, սա նաև պետության խնդիրն է»,-ասել է նա:
