«Արդար Հայաստան» կուսակցությունը մասնակցելու է Թալին համայնքի ավագանու ընտրություններին։ Այս մասին ֆեսյբուքյան գրառմամբ հանդես է եկել կուսակցության նախագահ Նորիկ Նորիկյանը։
Հարգելի՛ բարեկամներ
Ս.թ. սեպտեմբերի 25-ին մի շարք համայնքներում տեղի են ունենալու համամասնական ընտրակարգով անցկացվող համայնքների ավագանիների հերթական ընտրություններ:
«Արդար Հայաստան» կուսակցությունը, արձանագրելով, որ ՏԻՄ համակարգում առկա են բազմաթիվ չլուծված հիմնախնդիրներ, միաժամանակ, կարևորելով խոշորացվող համայնքների առաջիկա տարիների կայացման գործընթացը, և ձգտելով իր հնարավորությունների սահմաններում մասնակիցը դառնալ համայնքների զարգացման գործընթացին, որոշում է կայացրել մի քանի համայնքներում մասնակցել ավագանու ընտրություններին:
Համայնքների ղեկավարների թեկնածուներին ընտրելիս, «Արդար Հայաստան» կուսակցությունն առաջանորդվել է բացառապես այդ համայնքների առանձնահատկություններով ու շահերով, համայնքի ղեկավարների թեկնածուների աշխատանքային գործունեության ընթացքում արձանագրած արդյունքներով:
«Արդար Հայաստան» կուսակցության համար ՏԻՄ ընտրություններն առաջին հերթին միջոց են համայնքներում առկա հիմնախնդիրները կարողունակ ավագանու և համայնքի ղեկավարի արդյունավետ գործունեության միջոցով լուծելու համար:
«Արդար Հայաստան» կուսակցությունը մասնակցելու է ՀՀ ԱՐԱԳԱԾՈՏՆԻ մարզի ԹԱԼԻՆ խոշորացված համայնքի ավագանու ընտրություններին, որի ընտրական ցուցակը գլխավորում է պարկեշտ, ինտելեկտուալ, հավասարկշռված, մասնագիտական բարձր կարողություններով օժտված Արմեն Գրիգորյանը։
«Արդար Հայաստան» կուսակցությունը միտված է իսկապես արդար, թափանցիկ, ժողովրդավարական ընտրությունների անցկացմանը և հորդորում է իրավասու մարմիններին իրենց լիազորությունների շրջանակներում ապահովել իսկապես մրցակցային ու ԱՐԴԱՐ ընտրություններ:
«Արդար Հայաստան» կուսակցության կառավարման խորհուրդ
22.08.2022թ.
