Տեղի է ունեցել ՀՀ քաղաքաշինության, տեխնիկական և հրդեհային անվտանգության տեսչական մարմնի կառավարման խորհրդի հերթական նիստը։ Այս մասին հայտնում են ՀՀ արտակարգ իրավիճակների նախարարության տեղեկատվության վարչությունից՝ նշելով, որ նիստի օրակարգում ընդգրկված է եղել 5 հարց։
Նիստը նախագահել է ՔՏՀԱ տեսչական մարմնի կառավարման խորհրդի (այսուհետ՝ Կառավարման խորհուրդ) նախագահ, ՀՀ արտակարգ իրավիճակների նախարար Արմեն Փամբուխչյանը։
Կառավարման խորհրդի նիստի օրակարգի 1-ին հարցը վերաբերել է ՔՏՀԱ տեսչական մարմնի ղեկավարի տեղակալի թեկնածությանը հավանություն տալուն։
Տվյալ պաշտոնում առաջադրվել է Սուրեն Մինասյանի թեկնածությունը։ Կառավարման Խորհրդի անդամները Ս․ Մինասյանին ուղղել են իրենց հարցերը՝ կապված նրա՝ տեսչական մարմնի ղեկավարի տեղակալի պաշտոնում նշանակվելու դեպքում նախատեսվող գործունեության հետ։ Կառավարման Խորհուրդը հավանություն է տվել առաջադրված թեկնածությանը։ Կառավարման խորհրդի համապատասխան որոշումից հետո այն կներկայացվի ՀՀ վարչապետի հաստատմանը։
Այնուհետև Կառավարման խորհրդի անդամները քննարկել են օրակարգում ընդգրկված՝ տեսչական մարմնի ընթացիկ ու առաջիկա գործունեությանն առնչվող մնացած հարցերը։
