Պատերազմը պետք է ավարտվի արդար խաղաղությամբ՝ հիմնված Ուկրաինայի տարածքային ամբողջականության և ինքնիշխանության վրա, հայտարարել է Թուրքիայի նախագահ Ռեջեփ Թայիփ Էրդողանը։
«Կարծում ենք, որ պատերազմը, որը շարունակվում է փետրվարի 24-ից, պետք է ավարտվի արդար խաղաղությամբ՝ հիմնված Ուկրաինայի տարածքային ամբողջականության և ինքնիշխանության վրա: Թուրքիան մեծ ջանքեր է գործադրել այդ նպատակին հասնելու համար՝ ստեղծելով արդյունավետ դիվանագիտական ալիք: Մենք նշանակալի ձեռքբերումներ ունենք, մասնավորապես՝ մարտին Անթալիայում արտգործնախարարների հանդիպումը, Ստամբուլում խաղաղ բանակցությունները, հացահատիկի համաձայնագիրը»,- ասել է Էրդողանը։
Նա ընդգծել է, որ միջազգային իրավունքը պահանջում է Ղրիմը վերադարձնել Ուկրաինային։
«Դա չափազանց կարևոր է ողջ տարածաշրջանի և գլոբալ անվտանգության համակարգի, կայունության, Ուկրաինայի տարածքային ամբողջականության, նրա ինքնիշխանության պահպանման, քաղաքական համակարգի համար»,- պարզաբանել է նա։
Էրդողանն ասել է, որ Ղրիմն Ուկրաինայինն է, հետևաբար Թուրքիան աջակցում է Ղրիմին՝ որպես Ուկրաինայի մաս։ Թուրքիայի նախագահը հավելել է, որ Ղրիմի թաթարները Ուկրաինայի քաղաքացիներ են, և Ղրիմը պետք է զարգացնել նրանց շահերից ելնելով։
