Հայաստանի կառավարությունը չի փոխհատուցի «Սուրմալու» տոնավաճառում տեղի ունեցած պայթյունից տուժած տնտեսվարողներին: Այս մասին Կառավարության նիստից հետո լրագրողների հետ զրույցում ասաց ՀՀ էկոնոմիկայի նախարար Վահան Քերոբյանը:
«Ինչումն է խնդիրը. եթե այդ միջավայրում աշխատող գործարարներն ապահովագրած լինեին իրենց գույքը, նշեմ, որ այդ ծառայությունը հասանելի է, ու շատ մարդիկ անում են՝ ապահովագրում են իրենց տարածքը, գույքը, բնականաբար, այդ դեպքերում հատուցելի կլիներ վնասը: Կառավարությունը չի կարող իր վրա ֆունկցիա վերցնել՝ փոխհատուցել այն ծախսը, որը պետք է աներ ապահովագրական ընկերությունը: Եթե գործարարը նման ռիսկերը մեծ չի համարել, ապա Կառավարությունն անելիք չունի»,- ասաց Քերոբյանը:
Վերջինս նշեց, որ Հայաստանի բիզնեսմենները պետք է սովորեն աշխատել բարձր ստանդարտներով և չակնկալեն, որ իրենց վնասները պետք է փոխհատուցի Կառավարությունը: