«Մոսկվայի տուն» մոսկովյան մշակութագործարարական կենտրոնում երեկ մեկնարկել է Ռուսական արտահանման կենտրոնի կողմից կազմակերպված Միջազգային բազմաոլորտ գործարար առաքելությունը։
ՀՀ Էկոնոմիկայի նախարարությունից հայտնում են, որ Վահան Քերոբյանն իր բացման խոսքում նշել է, թե Ռուսական արտահանման կենտրոնի հետ տարիների ընթացքում ձևավորվել են գործընկերային հարաբերություններ ու ակտիվ համագործակցություն։ Նախարարը գոհունակությամբ նշել է, որ Կենտրոնի գործունեությունը Հայաստանում ընդլայնվում է, ինչը կարող է նպաստել ցուցանիշների ավելացմանը համագործակցության բոլոր ոլորտներում:
Լիագումար նիստում ելույթով հանդես է եկել Էկոնոմիկայի նախարարի տեղակալ Նարեկ Տերյանը, ով ներկայացրել է Հայաստանի ներդրումային միջավայրը, երկու երկրների միջև առևտրաշրջանառությունը, ինչպես նաև համագործակցության նոր հնարավորությունները։
Գործարար առաքելության շրջանակներում նախատեսվում է ընդգրկուն գործարար ծրագիր, որը ներառում է լիագումար նիստ՝ նվիրված Հայաստանի և Ռուսաստանի միջև առևտրատնտեսական համագործակցության առաջնահերթություններին, թեմատիկ կլոր սեղաններ, պաշտոնատար անձանց և ոլորտի փորձագետների ելույթներ։
