Կալիֆորնիայում ընդունված որոշման համաձայն՝ 2035 թվականից հետո ամերիկյան այդ նահանգում կարգելվի բենզինով ու գազով աշխատող շարժիչներով նոր ավտոմեքենաների վաճառքը։
Կարգավորումն ուժի մեջ է մտնելու աստիճանաբար՝ 2026 թվականին նահանգում վաճառվող նոր ավտոմեքենաների առնվազն 35 տոկոսը պետք է լինեն էլեկտրական, կամ հիբրիդային կամ ջրածնի հիմքով աշխատող շարժիչներով։ Այնուհետև՝ 2030-ին վաճառվող նման նոր ավտոմեքենաների համամասնությունը պետք է կազմի ընդհանուրի առնվազն 68 տոկոսը, իսկ 2035-ից Կալիֆորնիայում վաճառվող բոլոր նոր մեքենաները պետք է այդպիսին լինեն։
Նահանգային իշխանությունների փոխանցմամբ՝ այս քայլի նպատակն է որքան հնարավոր է շուտ հասնել մթնոլորտ «զրո արտանետումների» վիճակին։
Կալիֆորնիան ԱՄՆ ամենաբնակեցված նահանգն է և աշխարհի խոշորագույն տնտեսություններից մեկը։
Աղբյուրը՝ Azatutyun.am
