ՄԱԳԱՏԷ-ի առաքելությունը մեկնել է Զապորոժիեի ատոմակայան և դեպքի վայր կժամանի մի քանի օրից: Այս մասին Twitter-ի իր էջում գրել է Ատոմային էներգիայի միջազգային գործակալության ղեկավար Ռաֆայել Գրոսսին։
«Մենք պետք է պաշտպանենք Ուկրաինայի և Եվրոպայի ամենամեծ միջուկային օբյեկտի անվտանգությունը։ Հպարտ եմ՝ ղեկավարել այս առաքելությունը», – ասել է Գրոսսին:
Ռուսաստանը ՄԱԿ-ի համաժողովում արգելափակել էր միջուկային զենքի չտարածման պայմանագիրը կատարելու մասին ամփոփիչ փաստաթղթի ընդունումը, քանի որ այնտեղ խոսք կար Ուկրաինայում իրավիճակի մասին։ Փաստաթուղթը լուրջ մտահոգություն էր հայտնում Ուկրաինայի էլեկտրակայանների, ներառյալ պատերազմի՝ սկզբում ռուսական ուժերի կողմից գրաված Զապորոժիեի ատոմակայանի շուրջ ռազմական գործողությունների կապակցությամբ։
Կիևը և Մոսկվան միմյանց են մեղադրում ատոմակայանի հրետակոծման համար։ Արևմուտքը և Ուկրաինան պահանջել են, որ Ռուսաստանի իշխանությունները թույլ տան ՄԱԿ-ի տեսուչներին՝ մտնել տարածք։
