Թիվ 1-ը գրավոր հարցմամբ դիմել էր ՀՀ աշխատանքի և սոցիալական հարցերի նախարարություն, ստանալու տեղեկատվություն, թե 2018 թ․-ի հեղափոխությունից հետո քանի՞ անգամ ու որքանո՞վ է բարձրացվել թոշակը/աշխատավարձերը։
2018 թվականին նվազագույն ամսական աշխատավարձի չափը Հայաստանի Հանրապետությունում սահմանաված է եղել 55,000 ՀՀ դրամ, որը 2020 թվականի հունվարի 1-ից սահմանվել է 68,000 դրամ՝ բարձրանալով շուրջ 23․64 տոկոսով։
Տեղեկանում ենք նաև, որ նվազագույն աշխատավարձի բարձրացման արդյունքում 23․64 տոկոսով բարձրացվել են նաև աշխատանքային պարտականությունների կատարման հետ կապված խեղման, մասնագիտական հիվանդության և առողջության այլ վնասման հետևանքով պատճառված վնասի հատուցման չափերը։
Հավելենք, որ նվազագույն աշխատավարձի նշված չափերի մեջ ներառված չեն աշխատավարձից վճարվող հարկերը, նպատակային սոցիալական վճարները, հավելումները, հավելավճարները, պարգևատրումները և խրախուսման այլ վճարները։
Ըստ Աշխատանքի և սոցիալական հարցերի նախարարության տրամադրած վիճակագրության՝ աշխատանքային կենսաթոշակի չափը հաշվարկելու համար հիմնական կեսաթոշակի սահմանված չափը 2018 թ․-ի հունվարի 1-ի դրությամբ կազմել է 16000 դրամ, իսկ 2022 թ․-ի սեպտեմբերի 1-ի դրությամբ սահմանվելու է 21000 դրամ։
Վերը նշված նույն ժամանակահատվածում փոփոխության է ենթարկվել նաև ծերության նպաստի համար սահմանված չափը։ 2018 թ․-ին կազմել է 16000 դրամ, 2022 թ․-ին՝ 30500 դրամ։
