ՀՀ վարչապետի աշխատակազմի ղեկավարի տեղակալ Տարոն Չախոյանն արձագանքել է ՀՀ ԱԺ ընդդիմադիր փոխխոսնակ Իշխան Սաղաթելյանի այն հայտարարությանը, ըստ որի՝ «Բրյուսելում նախօրեին տեղի ունեցած հանդիպումից հետո նկատելի է, որ Հայաստանն ու Արցախը միջազգային հարթակներում շահերը պաշտպանող որևէ ներկայացուցիչ չունի։ Ադրբեջանի նախագահ Ալիևն այդ հանդիպմանը ներկայացել էր սեփական օրակարգով ու, ըստ էության, լուծել իր առջև դրված բոլոր խնդիրները»։
Ըստ Չախոյանի՝ Իշխան Սաղաթելյանը հավանաբար ուղիղ կապի մեջ է Ալիևի հետ, քանի որ հայտարարում է, որ Բրյուսելում տեղի ունեցած հանդիպման ժամանակ Ալիևը ներկայացել է սեփական օրակարգով և լուծել իր առջև դրված խնդիրները։
«Եռակողմ հանդիպման մասնակիցների կողմից առայժմ ոչ մի կոնկրետ մանրամասներ չեն հրապարակվել հանդիպման արդյունքների մասին, իսկ Իշխան Սաղաթելյանը փաստորեն տեղյակ է Ալիևի օրակարգից և լուծած խնդիրներից։
Հարց է ծագում՝ որտեղի՞ց և ինչպե՞ս։
Չնայած ինչ սպասես մի քաղաքական ուժի կարկառուն ներկայացուցչից, որն իր քարոզարշավն իրականացնում էր բայրաքթարներով հայ զինվորների խոցման կադրերով։ Իսկ Ալիևի օրակարգից ու լուծած խնդիրներից տեղյակ Իշխան Սաղաթելյանը տեղյակ չէ՞ արդյոք, թե օրեր առաջ իր առաջնորդը՝ Քոչարյան Ռոբերտը, ինչ օրակարգով էր մեկնել Աթենք և ինչ խնդիրներ էր լուծում. չլինի՞ թե լողափին հայրենիք էր փրկում»,- հավելել է նա:
