Այսօր Կառավարության նիստին ՀՀ վարչապետ Նիկոլ Փաշինյանն անդրադարձավ կենսաթոշակների բարձրացման խնդրին՝ հայտնելով, որ սեպտեմբերի 1-ից թոշակները երեք հազար դրամով բարձրացնելու որոշումը կայացնելուց հետո իրեն մոտեցել էին կենսաթոշակառուներ ու հայտնել, որ Կառավարության նիստում իրենք հայտարարել են՝ առնվազն 3 հազար դրամով կավելանա իրենց կենսաթոշակը, բայց այն ավելանում է 1900 դրամով կամ 3 հազար դրամից պակաս:
«Մենք քննարկում արեցինք և պարզեցինք, որ թոշակառուների 97,5 տոկոսի համար թոշակը բարձրանում է սեպտեմբերի մեկին առնվազն 3 հազար դրամով, բայց կա 6400 թոշակառու, որոնց համար թոշակը գործող բանաձևով 2500 դրամով է բարձրանում, 5300 հոգու համար բարձրանում է 1900 դրամով»,- ասաց վարչապետը:
Վերը նշված թոշակառուների համար լրացուցիչ որոշում կկայացվի, որ, ինչպես խոստացել են, սեպտեմբերի 1-ից բոլորի համար կենսաթոշակը բարձրանա առնվազն երեք հազար դրամով:
ՀՀ աշխատանքի և սոցիալական հարցերի նախարար Նարեկ Մկրտչյանն էլ նշեց՝ որպեսզի թյուրընկալումների առիթ չլինի, քննարկումների արդյունքում որոշվել է, որ կբարձրացվի նվազագույն կենսաթոշակը՝ սահմանելով 31,600 դրամ, որն արդեն կերաշխավորի, որ բոլորն առնվազն 3000 դրամը կստանան:
