Մհեր Սեդրակյանը ներկայացել է դատախազություն, ծանոթացել ապօրինի գույքի ծագմանը վերաբերող նյութերին

ԱԺ նախկին պատգամավոր Մհեր Սեդրակյանը այսօր ներկայացել է ՀՀ գլխավոր դատախազություն: Տեղեկությունը «Հայկական ժամանակին» հայտնել է Գլխավոր դատախազի խորհրդական Գոռ Աբրահամյանը:

Նշենք, որ Սեդրակյանի և նրա հետ փոխկապակցված անձանց գույքի նկատմամբ, որպես հայցի նախնական ապահովման միջոց, դատախազության ներկայացրած միջնորդության հիման վրա ավելի վաղ դատարանը կիրառել էր կալանք:

«Սեդրակյանը հրավիրվել էր Դատախազություն: Նա ներկայացել է՝ այդպիսով իրացնելով իր իրավունքը: Վերջինս ծանոթացել է ապօրինի ծագում ունեցող գույքի բռնագանձման ուսումնասիրության վարույթի նյութերին, որպեսզի դիրքորոշում հայտնի»,- ասաց Աբրահամյանը: