ԱԺ տնտեսական հարցերի հանձնաժողովը դրական եզրակացություն տվեց «Վարչական իրավախախտումների վերաբերյալ» օրենսգրքում և «Առևտրի և ծառայությունների մասին» օրենքում փոփոխությունների նախագծերին։
Առաջարկվում է փոփոխություններ կատարել գազալցակայաններում և բենզալցակայաններում ստուգումներին և պատասխանատվության մեխանիզմներին:
Նախագծի համահեղինակ Ծովինար Վարդանյանը նշեց, թե «Այս պահին թերլիցքավորման արդյունքում ձևավորված տուգանքը ֆիքսված գումար է՝ 500 հազար դրամ: Ըստ նախագծի՝ առաջարկվում է տուգանքները սահմանել ֆիքսված 200 հազար դրամ, գումարած տուգանքը հայտնաբերելուն նախորդող եռամսյակի շրջանառության 0.5 տոկոսը»։
Բացի այդ, օրինագծով առաջարկվում է, որ լցակայանների կողմից թերլցման դեպք հայտնաբերելու դեպքում չափումների միասնականության ապահովման ոլորտում վերահսկողություն իրականացնող տեսչական մարմինը մեկ ամիս ժամկետով փակցնում է «Մենք տուգանվել ենք թերլիցքավորման համար» ցուցանակ:
Բացի այդ, օրենքի նախագծով տնտեսվարող սուբյեկտները պարտավոր են ունենալ չափագիտության բնագավառում իրենց մոտ իրականացված նախորդ ստուգումների ժամկետների, արդյունքների մասին տեղեկատվություն պարունակող QR կոդեր:
Հանձնաժողովի փոխնախագահ Բաբկեն Թունյանն էլ նշեց, թե համապատասխան գրություն փակցնելը կմոտիվացնի տնտեսվարողներին. «Մի շատ կարևոր հանգամանք՝ լրացուցիչ պատժամիջոցը, որ հիմա կիրառում ենք, ցուցանակը փակցնելը, իմ կարծիքով, ավելի զգաստացնող ու ավելի խիստ պատիժ է, քան տուգանքի չափը: Տնտեսվարողներին սա ավելի շատ է մոտիվացնելու, որ խախտումներ չանեն: Սա հանրային վերահսկողության գործիք է: Կարծում եմ, որ ընկերությունների համար իրենց հեղինակությունը շատ ավելի թանկ է, քան տուգանքը, որ մուծելու են»։
