ՀՀ կառավարությունն այսօր որոշում ընդունեց Հայաստանի պետական տնտեսագիտական համալսարանից 2014 թվականին վերցված տարածքը կրկին վերադարձնել բուհին: Հարցը ներառված էր Կառավարության այսօրվա նիստի չզեկուցվող հարցերի մեջ:
Նախագծում ասվում է, որ 2014 թվականի մայիսին Նալբանդյան 128 հասցեում գտնվող N6 ուսումնական մասնաշենքի 2-րդ հարկից 275 քառ. մետր մակերեսով տարածքը հետ է վերցվել «Հայաստանի պետական տնտեսագիտական համալսարան» ՊՈԱԿ-ից և 10 տարի ժամկետով անհատույց օգտագործման իրավունքով տրամադրվել «Հայաստանում բրիտանական բիզնես դպրոց» ՓԲ ընկերությանը: Սակայն նշված տարածքն արդեն մի քանի տարի է, ինչ վերջինս չի օգտագործում: Ավելին՝ ներկայումս «Հայաստանում բրիտանական բիզնես դպրոց» ՓԲ ընկերությունը գտնվում է լուծարման գործընթացում: Դրան զուգահեռ՝ «Հայաստանի պետական տնտեսագիտական համալսարան» ՊՈԱԿ-ը ուսանողների քանակի ավելացման և լսարանների սղությամբ պայմանավորված՝ դասապրոցեսն իրականացնում է երեք հերթափոխով:
Հաշվի առնելով այս հանգամանքը՝ որոշման նախագծով առաջարկվում է այն հետ վերցնել «Հայաստանում բրիտանական բիզնես դպրոց» ՓԲ ընկերությունից և անժամկետ, անհատույց օգտագործման իրավունքով ամրացնել «Հայաստանի պետական տնտեսագիտական համալսարան» պետական ոչ առևտրային կազմակերպությանը:
