Երևանի Կարեն Դեմիրճյանի անվան մարզահամերգային համալիրում շարունակվում է «STARMUS VI» գիտության ու արվեստի միջազգային փառատոնը, որի շրջանակում երեկ տեղի է ունեցել նաև «Another World» («Ուրիշ աշխարհ») խորագրով համերգը լեգենդար «Queen» խմբի կիթառահար Բրայան Մեյի և մի խումբ անվանի երաժիշտների մասնակցությամբ:
Միջոցառմանը ներկա են եղել ՀՀ նախագահ Վահագն Խաչատուրյանը, ԿԳՄՍ նախարար Վահրամ Դումանյանը, կառավարության այլ անդամներ:
Համերգի ամենասպասված իրադարձություններից մեկը Տավուշի թեմի մանկապատանեկան երգչախմբի ելույթն էր: Խումբը կատարել է «Queen»-ի երգացանկի մի քանի հայտնի ստեղծագործություններ` շարքը եզրափակելով «We are the champions» երգով և արժանանալով հանդիսատեսի հոտնկայս ծափահարություններին: Երեկոյի ընթացքում մարզահամերգային համալիրի բեմում կատարումներով հանդես են եկել նաև Դերեկ Շերինյանը` Սայմըն Ֆիլիպսի, Ռիք Ֆիերաբրաչիի և Ռոն Թալ Բամբլֆութի հետ, անգլիացի երաժիշտ Գրեհեմ Գոուլդմանը, «System of a Down» խմբի մենակատար Սերժ Թանկյանը, «Նեմրա» հայկական ռոք խումբը և Գոռ Սուջյանը:
Բրայան Մեյը հատուկ կատարմամբ հանդես է եկել նաև Ջիվան Գասպարյան կրտսերի հետ՝ ի հիշատակ դուդուկահար Ջիվան Գասպարյանի: «Queen» խմբի կիթառահարն առանձնակի ջերմությամբ է հիշել Ջիվան Գասպարյանի հետ համատեղ աշխատանքը «Գլադիատոր» ֆիլմի նկարահանումների ձայնագրությունների ժամանակ։
«STARMUS VI» փառատոնի 3-րդ օրվա շրջանակում կայացել է նաև «Բացահայտի՛ր տիեզերքը և փոխի՛ր աշխարհը» համաժողովը: «The Planetary Society»-ի համահիմնադիր և պատվավոր գործադիր տնօրեն Լուիս Ֆրիդմանը պատմել է դեպի Մարս մարդկության ճանապարհորդությունների մասին՝ հիշատակելով նաև անվանի հայ գիտականների ներդրումն այդ գործընթացում։ Համաժողովին մասնակցել են նաև Բեթանի Էլմանը, Սքոթ Հաբըրդը, Միշել Մայորը, Լիզա Կալտենեգերը և Դեյվիդ Գրինսփուն:
Այսօր արդեն մեկնարկում է «Ստարմուս» («Science Camp») գիտության ճամբարը, որը կանցկացվի Ազատության հրապարակում սեպտեմբերի 8-11-ը՝ ժամը 17:00-23:00-ը: Ծրագրին մասնակցությունն անվճար է, այն բաց է բոլորի համար:
Ա. Սպենդիարյանի անվան օպերայի և բալետի ազգային ակադեմիական թատրոնին հարակից տարածքն արդեն իսկ վերածվել է գիտության ու տեխնոլոգիաների մասշտաբային կենտրոնի, որտեղ ամենահասանելի ձևաչափերով թեմատիկ տաղավարներում թե՛ փոքրերի, թե՛ մեծերի համար կներկայացվեն գիտության նորագույն նվաճումներն ու ձեռքբերումները՝ «Աստղաֆիզիկա», «Լազերային ֆիզիկա», «Դրոններ», «Ռոբոտաշինություն», «Արհեստական բանականություն», «ԱգրոՏեխ», «Միջուկային էներգիա», «Համաճարակաբանություն», «Երկրաշարժի ուսումնասիրություններ», «Կապույտ-կանաչ մոլորակ», «Աստղադիտակներ», «Կենդանաբանություն և բուսաբանություն», «Աջակցող տեխնոլոգիաներ», «Տիեզերական և արհեստական արբանյակներ» թեմաների շուրջ։
Հիշեցնենք՝ Հայաստանում փառատոնն անցկացվում է «STARMUS VI. 50 տարի Մարսի վրա» խորագրով և նվիրված է Մարսի վրա «Մարս 3» տիեզերակայանի առաջին վայրէջքի 50-ամյակին: «STARMUS VI» փառատոնի շրջանակում Հայաստան են այցելել աշխարհահռչակ տիեզերագնացներ, Նոբելյան մրցանակակիրներ, միջազգային ճանաչում ունեցող արտիստներ ու գիտնականներ:
Փառատոնը կշարունակվի մինչև սեպտեմբերի 11-ը:
Լուսանկարները՝ «Արմենպրեսի»
