Այսօր Բաքվում տեղի է ունեցել «Հյուսիս-Հարավ» տրանսպորտային միջանցքի զարգացման հեռանկարների վերաբերյալ Ադրբեջանի, Ռուսաստանի և Իրանի պաշտոնատար անձանց մասնակցությամբ համատեղ միջոցառում: Միջոցառմանը ստորագրվել է Բաքվի հռչակագիրը՝ Ադրբեջանի, Իրանի և Ռուսաստանի միջև տրանսպորտային միջանցքի զարգացման շուրջ առաջին եռակողմ հանդիպման արդյունքների վերաբերյալ: Հռչակագիրը ստորագրել են Ադրբեջանի փոխվարչապետ Շահին Մուստաֆաևը, Իրանի ճանապարհների և քաղաքային զարգացման նախարար Ռուստամ Ղասեմին և Ռուսաստանի փոխվարչապետ Ալեքսանդր Նովակը։
Հռչակագրի համաձայն՝ կողմերը պատրաստակամություն են հայտնել համագործակցել ենթակառուցվածքի և տրանսպորտային հնարավորությունների գնահատման և վերլուծության ոլորտում՝ միջանցքն ամբողջությամբ օգտագործելու համար։ Կողմերը կարևորել են երկրների միջև համատեղ աշխատանքային խմբի ստեղծումը և մտադիր են առաջին նիստն անցկացնել մեկ ամսվա ընթացքում:
Բացի այդ՝ կողմերը հայտարարել են, որ մտադիր են մեկ ամսվա ընթացքում պատրաստել «Ռեշտ-Աստարա» երկաթուղային նախագծի վերաբերյալ համաձայնագրի նախագիծը և բանակցություններ սկսել մինչև 2022 թվականի վերջը:
