Սերբիայի մայրաքաղաք Բելգրադում այսօր մեկնարկել է Ըմբշամարտի աշխարհի առաջնությունը: Առաջինը մրցասպարեզ են դուրս եկել հունահռոմեական ոճի ըմբիշները: Այսօր սկսվել է մեդալների խաղարկությունը 4 քաշային կարգում: Ցավոք, առաջնության մեկնարկը անհաջող է դասավորվել Հայաստանի հավաքականի համար:
Մեր հավաքականից առաջինը մրցագորգ է դուրս եկել 77 կգ քաշային, Աշխարհի չեմպիոն Մալխաս Ամոյանը, ով մեդալի հիմնական հույսերից մեկն էր: Որակավորման փուլի գոտեմարտում Մալխասը մրցել է հունգարացի Զոլտան Լևային հետ և ցավալի պարտություն կրել: Առաջին կեսից հետո Մալխասը առջևում է եղել 3-0 հաշվով, սակայն երկրորդ կեսում հունգարացին հավասարեցրել է հաշիվը, և 3-3 հաշվի պարագայում հաղթանակը շնորհվել է հունգարացուն:
Հիշեցնենք, որ Մալխասը 72 կգ քաշային կարգում 2021 թվականի աշխարհի չեմպիոնն է, նույն թվականին Եվրոպայի փոխչեմպիոն է դարձել, 2020 թվականի Աշխարհի անհատական գավաթի արծաթե մեդալակիրն է, 72 կգ քաշային կարգում 2019 թվականի երիտասարդների Եվրոպայի առաջնության չեմպիոնն է, 67 քաշային կարգում 2018 թվականին երիտասարդների աշխարհի առաջնության չեմպիոն է դարձել, 2017-ին՝ երիտասարդների աշխարհի առաջնության փոխչեմպիոն։ 2022 թվականին՝ Եվրոպայի չեմպիոն։ Հայաստանի սպորտի վաստակավոր վարպետ է:
Այսօր Հայաստանը ունի ևս մեկ ներկայացուցիչ: 55 կգ քաշայինների կարգում մրցագորգ դուրս կգա Եվրոպայի առաջնության այս տարվա բրոնզե մեդալակիր Ռուդիկ Մկրտչյանը:
